Były hałoŭny sudździa Vialikabrytanii ačoliŭ novastvorany kamiercyjny sud u Kazachstanie
Adna ź viadučych sudovych fihur Złučanaha Karaleŭstva, były pieršy Viarchoŭny sudździa sudoŭ Anhlii i Uelsa łord Hary Kenet Vułf byŭ pryznačany hałoŭnym sudździoj novaha kamiercyjnaha suda ŭ Kazachstanie, razam z vaśmiu inšymi sudździami i staršymi jurystami ź Vialikabrytanii, pieradaje «Novoje vriemia».
Hety sud stvorany ŭśled za anałahičnymi sudami ŭ takich krainach, jak Sinhapur, Hankonh, Dubaj, Abu-Dabi i Katar u ramkach prahramy madernizacyi z udziełam Mižnarodnaha finansavaha centra Astany (MFCA), ź pierśpiektyvaj zrabić jaho viadučym finansavym centram u Centralnaj Azii.
mfa.gov.kz
Usie sudździ buduć ź Vialikabrytanii, u svajoj pracy jany buduć kiravacca zakanadaŭstvam MFCA, jakoje, pa sutnaści, źjaŭlajecca brytanskim ahulnym pravam — «Tym, u čym jany (kazachstancy — red.) naohuł nie majuć dośviedu», — adznačyŭ Vułf.
Sud byŭ adkryty ŭ pačatku hetaha hoda, pieršapačatkova vialikaja častka pracy ŭklučała ŭ siabie padrychtoŭku miascovych sudovych orhanaŭ i advakataŭ. Jon budzie ŭklučać sud pieršaha ŭzroŭniu i apielacyjny sud, u jakim łord Vułf budzie časam zasiadać. Taksama budzie paskorana pracedura dla nievialikich skarhaŭ. Buduć razhladacca standartnyja kamiercyjnyja i dahavornyja sprečki.
Sudździ buduć naviedvać Kazachstan piać razoŭ na hod. Usie jany byli pryviedzieny da prysiahi na adpaviednaj cyrymonii, pryčym prysiaha była padobnaj na prysiahu ŭ Vialikabrytanii. Byŭ raspracavany admysłovy dyzajn mantyj, jany ŭklučajuć błakitny i załaty kolery respubliki.
«Sud budzie prasoŭvać anhlijskaje kamiercyjnaje prava i pryznańnie važnaści viaršenstva zakona, — kaža Vułf. — Jon stvaraje suviazi pamiž krainaj va Uschodniaj i Centralnaj Azii, jakaja chutka raźvivajecca, i Vialikabrytanijaj, tamu jany buduć źviartacca da nas pa paradu i kiraŭnictva».