Lohki letni desiert: panakota z kłubničnym sousam RECEPT
Raspačaŭsia siezon jahad. Padajecca, što desierty nam bolš nie patrebnyja, bo možna zahasić svaju prahu da sałodkaha sakavitymi kłubnicami, sunicami i čarešniaj. Ale mnie ŭ niejki momant stanovicca nudna prosta jeści jahady. Tady ja pačynaju šukać recepty desiertaŭ, jakija idealna ź imi spałučajucca. Adzin z takich receptaŭ — heta dobra viadomaja panakota. Tak, vy možacie znajści hety desiert na paličkach u kramie, ale raju vam chacia b raz pasprabavać zrabić jaho samastojna.
Recept panakoty naradziŭsia ŭ dvaccatym stahodździ ŭ Italii. Nazva pierakładajecca jak «varanyja viarški», što idealna adlustroŭvaje i hałoŭny inhredyjent, i sposab jaho pryhatavańnia.
Panakota z kłubnicami.
Isnuje vialikaja kolkaść receptaŭ hetaha desiertu, roznych pa praporcyjach i składnikach. Navat chodziać sprečki, što pravilnaja panakota heta taja, što biez žełacinu, ale ź jaječnymi białkami. Jość taksama sučasnyja varyjanty, dzie viarški aramatyzujucca nie vanillu, a łavandaj, harbataj ci ziołkami. Tak što, kali pa maim recepcie ŭsio atrymajecca, možna praciahvać biaskoncyja ekśpierymienty dalej.
Vam spatrebiacca:
- 8 hr. žełacinu;
- 265 hr. viarškoŭ, 33%;
- 110 hr. małaka 3,2%;
- 50 hr. cukru;
- vanil.
Pryhatavańnie
Pačynajem z žełacinu. Praściej za ŭsio vykarystoŭvać jaho ŭ listach. Treba prosta zamačyć ich u vadzie, a potym adcisnuć i dadać u sumieś. Kali vy bieracie zvyčajny paraškovy žełacin, to hetyja 8 hr. vy zalivajecie 48 hr. vady (roŭna ŭ 6 razoŭ bolš, čym žełacinu), pieramiešvajecie, čakajecie 4—5 chvilin, kab žełacin nabryniaŭ, i tady dadajacie ŭsio razam (žełacin i vada).
U satejnik nalivajem viarški, małako, dadajem cukar i vanilny cukar (ci esiencyju). Kaniečnie, lepiej za ŭsio vykarystoŭvać struk vanili, ale tady košt recepta adrazu pavyšajecca. Satejnik stavim na ahoń, davodzim da kipieńnia i adrazu vyklučajem. Dadajem žełacin i akuratna raźmiešvajem.
Raźlivajem panakotu pa šklankach ci ŭ silikonavyja formački. Dajom całkam astyć i pierakładajem u chaładzilnik. Moža spatrebicca da 5 hadzin, kab panakota stabilizavałasia.
Zachoŭvać panakotu možna 2—3 dni. Taki desiert možna navat zamarozić i trymać u ladoŭni kala miesiaca. U druhim vypadku pierad padačaj treba budzie dastać panakotu ź ladoŭni i pakinuć u chaładzilniku prykładna na hadzinu.
Padavać sa śviežymi jahadami. Možna chutka pryhatavać sous z kłubnic. Dla hetaha spatrebicca:
- 150 hr. kłubnic;
- 1 st. ł. cukru
- 1 st. ł. vady
Jahady parezać na kavałački, źmiašać z cukram, dadać vady i na maleńkim ahni davieści da kipieńnia. Źniać, astudzić. Kali žadajecie, kab sous byŭ adnarodnym, jaho možna pracierci praź sita ci «prabić» błendaram.
Smačna jeści!
