Śledčyja ekshumavali cieła sałdata Koržyča na patrabavańnie maci
Śledčyja ŭ spravie sałdata Alaksandra Koržyča, jaki hvałtoŭna zahinuŭ u vajskovaj častcy ŭ vieraśni 2017 hodu, praviali ekshumacyju cieła. Ab hetym Radyjo Svaboda raskazała maci zahinułaha sałdata Śviatłana.
7 červienia staršynia Śledčaha kamitetu Ivan Naskievič paviedamiŭ, što śledztva ŭ spravie Alaksandra Koržyča praciahnutaje, pryznačany šerah dadatkovych ekspertyz. Pavodle Naskieviča, jany zojmuć niekalki tydniaŭ, paśla čaho sprava budzie pieradadzienaja ŭ sud.
6 červienia cieła Alaksandra Koržyča było ekshumavanaje.
«Učora pryjechali, paklikali mianie na ekshumacyju. Vykapali, spytali, ci heta moj syn. Ja skazała, što tak, moj, — raskazała Śviatłana Koržyč. — Miascovych bolš nikoha nie dapuścili na ekshumacyju. Tolki mianie. Zabrali cieła ŭ morh, uziali ŭsio nieabchodnaje dla ekspertyzy. Skazali, što praź niekalki tydniaŭ paviedamiać vyniki».
Ekshumacyja cieła Alaksandra Koržyča była adnym z patrabavańniaŭ jaho maci, jakaja nie pahadziłasia z vysnovami śledztva. Śviatłana Koržyč znajomiłasia z materyjałami spravy na praciahu ŭsiaho traŭnia, paśla čaho źviarnułasia ŭ SK i administracyju Łukašenki z patrabavańniem pravieści ekshumacyju cieła syna dla praviadzieńnia dadatkovaj medycynskaj ekspertyzy. Jana pierakananaja, što syn staŭ achviaraj zabojstva.
Čytajcie taksama: «Jany pradaduć i dziaržavu, i Łukašenku». U maci sałdata Koržyča svaja viersija śmierci syna
