Mahiloviec pierakonvaje, što ŭčastkovyja zhvałtavali jaho dubinkaj. Ale sudzić buduć jaho, a nie milicyjantaŭ
Žychar Mahilova Stanisłaŭ abvinavaciŭ dvuch učastkovych u tym, što jany źbivali i katavali jaho. Maŭlaŭ, 30 śniežnia 2017 hoda jon sam zajšoŭ u «aporku», zadać pytańnie pa inšaj spravie, a jaho pačali źbivać. Nahodaj stała admova Stanisłava vykinuć cyharetu — jon kuryŭ na hanku pastarunka. Taksama mužčyna śćviardžaŭ, što ŭ jaho zadni prachod ustaŭlali milicejskuju dubinku, na jakuju adzieli preziervatyŭ.
Paśla, kali Stanisłaŭ źviarnuŭsia da ŭračej, u jaho nibyta znajšli «abvastreńnie hiemaroju», jakim jon nikoli nie chvareŭ.
Mužčyna napisaŭ zajavu ŭ prakuraturu. A na jaho samoha taksama zaviali dźvie spravy za chulihanstva: administratyŭnuju za łajanku matam i kryminalnuju, bo mužčyna złamaŭ stoł u apornym punkcie, udaryŭšy pa im kułakom.
U kancy maja Stanisłaŭ atrymaŭ adkaz z prakuratury. Kryminalnuju spravu na ŭčastkovych zavodzić admovilisia. Paviedamlałasia, što mužčyna vydumaŭ historyju z dubinkaj, kab paźbiehnuć adkaznaści za złamany stoł. Plus nie znajšli bijałahičnych śladoŭ ani na vopratcy Stanisłava, ani na dubincy. Praŭda, vopratku zabrali na ekśpiertyzu praz 2,5 miesiacy paśla zdareńnia. Sam mužčyna śćviardžaŭ, što za hety čas nieadnarazova pamyŭ jaje.
U historyi chapaje niezrazumiełych momantaŭ. Ale ž u vyniku sudzić buduć samoha Stanisłava — za toj złamany stoł.
