Biełaruskaja mastačka stvaryła kaśmičnuju sieryju partretaŭ z ajčynnymi tvorcami, jakija pracujuć z hukam i šumam FOTY
Mastačka Nadzieja Sajapina zakančvaje pracu nad svaim novym prajektam «Tvary šumu». Jon pryśviečany biełarusam, jakija stvarajuć šum ci ŭsprymajuć jaho zvonku pa prafiesijnych abaviazkach — muzykam, žurnalistam, barmenam.
Nadzieja Sajapina.
Tak, Nadzia ŭžo namalavała partrety takich pierson, jak Jaŭhien Kuźniacoŭ (barmen, stvaralnik Make-make Tiki King i Splash & Dash), Pafnucij Kuziukian (muzyka-vałtarnist), Illa Čarapko-Samachvałaŭ (vakalist hurtoŭ «Pietla pristrastija» i «Kasijapieja», akcior), Źmicier Žalevič (muzyka ŭ «Masque Noir»), Volha Padhajskaja (kampazitarka, arhanistka), Tania Kapitonava (žurnalistka), Jarasłaŭ Tamiła (hukarežysior «NAVIband»), Jahor Kipa (arhanizatar viečaryn «Bassota»), Ludmiła Pahodzina (žurnalistka, arhanizatarka i dydžej), Paša Plaha (miedyja-mastak).
Illa Čarapko.
Ludmiła Pahodzina.
Źmicier Žalevič.
Bubnačka «Akute» Viki Fejts.
Jaŭhien Kuźniacoŭ.
Pafnucij Kuziukian.
Volha Padhajskaja.
Rychtujucca pracy, hałoŭnymi hierojami jakich stanuć udzielniki prajekta «Shuma», tanc-mastačka Valeryja Chrypač i inšyja.
Kab atrymaŭsia kožny z hetych partretaŭ, Nadzieja hadzinami ŭvažliva intervjuiravała svaich surazmoŭcaŭ, fatahrafavała. Paśla drukavała niejtralnyja, čorna-biełyja fotazdymki na pałatnie i navierch nanosiła žyvapisnyja efiekty. Vobrazy, jakija my bačym na partretach, — heta pačućci ludziej ad kantaktaŭ z muzykaj, ich usprymańnie šumu, jakoje pieradajecca kolerami, linijami i mazkami.
Poŭnuju sieryju «Tvaraŭ šumu» chutka možna budzie pahladzieć u prastory «OK16»: piersanalnaja vystava Nadziei adkryjecca 28 červienia i budzie pracavać da 12 lipienia. Na adkryćci i zakryćci musić adbycca vystup niekatorych hierojaŭ partretaŭ.
Mastačka kaža, što heta tolki pieršy etap jaje daśledavańniaŭ šumu, pačatak prajekta. «Mnie vielmi cikavaja heta tema i dalej, mabyć, ja zachaplusia pramysłovym šumam ci, naprykład, źviarnusia da ludziej, jakija jaho nie ŭsprymajuć zusim. Tamu vystava hetaj sieryi partretaŭ nie kaniečnaja kropka».
