Cyhan z Mahilova trymaŭ niekalkich čałaviek u chlavie i prymušaŭ žabravać
24-hadovy mužčyna zatrymany. Na jaho zaviali kryminalnuju spravu za vymahalnictva.
Cyhan trymaŭ niekalki čałaviek u chlavach na svaim padvorku. Z 27-hadovaj miascovaj žycharki jon patrabavaŭ tysiaču dalaraŭ, kali jana choča vyzvalicca. Akramia taho, jon patrabavaŭ i ŭ svajakoŭ paciarpiełaj vykup za žančynu, patłumačyŭšy, što heta «kampiensacyja za jaje ŭtrymańnie», paviedamlaje mahiloŭskaja milicyja.
U chodzie pieratrusu pa miescy žycharstva abvinavačanaha kanfiskavali invalidny vazok, płakat ab dapamozie na lačeńnie chvorych dziaciej.
Pa apieratyŭnaj infarmacyi, abvinavačvany na praciahu paŭhoda prymušaŭ hramadzian da žabractva, jak na terytoryi Mahilova, a taksama ŭ Minsku, Barysavie i Homieli. Z užyvańniem fizičnaj siły jon prymušaŭ prasić miłaścinu kala bujnych handlovych centraŭ, cerkvaŭ, padziemnych pierachodaŭ i ŭ inšych hramadskich miescach.
Štodnia pracavali dva-try čałavieki, jakija źbirali kala 100 rubloŭ u dzień. Hetyja hrošy abvinavačvany zabiraŭ sabie, a paciarpiełych zabiaśpiečvaŭ tolki praduktami.
Sposaby časta mianialisia: chtości źbiraŭ hrošy na padstavie «na lačeńnie chvorym dzieciam», a niechta prasiŭ miłaścinu ŭ invalidnym vazku. Utrymlivalisia paciarpiełyja ŭ chlavach i prybudovach. Mužčyna ciapier znachodzicca pad vartaj.
