Ułady ustalujuć sistemu, zdolnuju złučyć 500 tysiač kamier, jakija ŭ realnym časie buduć sačyć za ludźmi i mašynami dy zmohuć identyfikavać luboha
Na pravavym partale pravo.by źjaviłasia supolnaja pastanova siłavych orhanaŭ: MUS, Dziaržkantrolu, Słužby biaśpieki prezidenta, AAC, MNS, KDB, Mytnaha i Pahraničnaha kamitetaŭ.
U joj havorycca pra arhanizacyju zakupu «Respublikanskaj sistemy manitorynhu hramadskaj biaśpieki».
Viadoma, što dakumient ab stvareńni takoj sistemy Łukašenka padpisaŭ jašče letaś.
Ale jak jana budzie vyhladać?
U apublikavanym dakumiencie možna ubačyć patrabavańni da sistemy, a jany nastupnyja:
— najaŭnaść sistemy aŭtamatyčnaha raspaznavańnia tvaraŭ,
— najaŭnaść sistemy aŭtamatyčnaha raspaznavańnia biełaruskich i zamiežnych aŭtamabilnych znakaŭ,
— najaŭnaść fotafiksacyi darožnaj abstanoŭki,
— najaŭnaść sistemy aŭtamatyčnaha detektavańnia padziej,
— mahčymaść padklučeńnia nie mienš jak 500 tysiač kamier,
— najaŭnaść pošuku padziej i vyznačeńnia tryvožnych padziej (pažaraŭ, avaryj i inšaje),
— vyznačeńnie znachodžańnia abjekta ŭ vyznačanaj zonie. U hetym punkcie cikavaja farmuloŭka «badziańnie» — mahčymaść vyznačyć asobu, jakaja doŭhi čas biazmetava chodzić u adnym kvadracie,
— mahčymaść fiksacyi vyjezdu na pałosy sustrečnaha ruchu i ruchu ŭ zabaronienych zonach, pavarotu ci razvarotu ŭ parušeńnie pravił darožnaha ruchu.
— mahčymaść vyznačeńnia pakinutych pradmietaŭ i asob, jakija ich pakinuli,
— mahčymaść aŭtamatyčnaha vyznačeńnia faktaŭ parušeńnia miežaŭ achoŭnych zon i abjektaŭ.
Inšymi słovami, vyhladaje, što ŭ Biełarusi maje źjavicca sistema ŭsieahulnaha videanazirańnia kštałtu tych, jakija isnujuć u niekatorych raźvitych krainach śvietu.
Dla raboty z hetymi źviestkami prapanujecca stvaryć Respublikanski centr apracoŭki źviestak.
Z dakumienta niajasna, ci budzie hetaja sistema apłačana ź biudžetnych srodkaŭ — ustanoŭščyku sistemy prapanujecca stać jaje apierataram i brać ź siłavych struktur abanienckuju płatu za karystańnie.