Minskzielanbud adreahavaŭ na publikacyju NN: Drevy kala MKADa žyvyja
U adnym z papiarednich materyjałaŭ my pisali pra toje, što dziasiatki tysiač dreŭ i kustoŭ, vysadžanych uzdoŭž tras vosieńniu, zahinuli. Vizualna ŭ mai 2018 hoda jany vyhladali miortvymi. Kamientar Minskzielanbuda my atrymać nie zmahli. Adnak u intervju partału Tut.by pradstaŭnik Minskzielanbuda adreahavaŭ na našu publikacyju.
Čytajcie taksama: Dziasiatki tysiač dreŭ i kustoŭ, vysadžanych uzdoŭž tras uvosieni, zahinuli
Jak vyśvietliłasia, u «Mienskzielanbudzie» nie zhodnyja z takimi vysnovami. Kiraŭnik słužby pa dobraŭparadkavańni i ŭtrymańni abjektaŭ haradskoj haspadarki pradpryjemstva Anžalika Puzankova kaža, što raśliny ŭzdoŭž kalcavoj vysadžvalisia jak u płanavym režymie, tak i ŭ suviazi z daručeńniem Kačanavaj. A čas pasadak, kaža jana, byŭ aptymalnym.
— Spryjalny pieryjad dla pasadki zaŭsiody byŭ z 15 kastryčnika da 15 maja. Ale ŭ suviazi z tym, što adbyłosia paciapleńnie, jon pamienšyŭsia. Tamu kazać pra toje, što tam parušanyja terminy pasadki — vialikaja pamyłka. Naadvarot, kali dreva znachodzicca ŭ stanie spakoju, jano lepš pryžyvajecca.
Pytańni vyklikała i technałohija pasadki. Tak, karystalniki źviarnuli ŭvahu na fota, dzie dreva sadžajuć z padrezanymi karaniami. Anžalika Puzankova kaža, što heta narmalnaja praktyka.
Fota: «Minsk-Novosti».
— U hadavalniku karaniovaja sistema śpiecyjalna padrazajecca, bo za košt hetaha ŭtvorajucca dadatkovyja karani, jakija pahłynajuć, i dreva potym lepš siłkujecca. Karaniovuju sistemu treba farmiravać, i jana pavinna być kampaktnaj.
Dy i ŭvohule ŭ standartnyja jamy sadžali standartny materyjał z hadavalnika, raspaviadaje śpiecyjalist. A dzie byŭ drenny hrunt — pryvozili novy. Vysadžvali drevy i kusty, ustojlivyja da ŭździejańnia antyhałalodnych solaŭ, jakimi zimoj pasypajuć kalcavuju. Heta byli jasień, klon, viarba, šypšyna, śpireja japonskaja i barbarys. Pasadki ažyćciaŭlalisia ŭ adpaviednaści z raspracavanym Instytutam dobraŭparadkavańnia i haradskoha dyzajnu prajektam, kaža Puzankova.
— Byŭ taksama raspracavany płan mierapryjemstvaŭ pa pavyšeńni žyćciazdolnaści hetych raślin u viasnovy pieryjad. Dla taho kab minimizavać nastupstvy ŭździejańnia soli, vosieńniu ŭ łunki zakłali plonku i nakryli hruntam, kab reahient nie trapiŭ u zonu karanioŭ. Uviesnu plonku z hruntam vydalili i na heta miesca zavieźli novy hrunt.
Akramia taho, stvały na zimu abhortvajuć spanbondam. Uviesnu jaho źniali, pamyli stvały i krony, a zatym stali pravodzić palivy i padkormki.
- Ale čamu tady drevy i kusty vyhladajuć miortvymi?
Anžalika Puzankova tłumačyć, što drevy žyvyja. Pa-pieršaje, toj ža jasień — heta dreva, jakoje raspuskajecca pozna. Pa-druhoje, čakać inšaha va ŭmovach ahresiŭnaha asiarodździa navat nie varta było. Pa-treciaje, abśledavańnie pakazała, što drevy žyvyja.
— Zrazumieła, što niama dreŭ i kustoŭ, jakija buduć va ŭmovach soli dobra raści. Vierchnija halinki na drevach mohuć admierci ad taho, što na ich traplaje solevaja sumieś. Ale sa śpiačych pupyšak utvarajucca novyja parastki. Taja ž situacyja i z chmyźniakami, dzie stvareńnie parastkaŭ idzie ad korania. Uźnikajuć novyja parastki, suchija halinki abrazajucca, i rost adnaŭlajecca, što ciapier i adbyvajecca. Bačna, što kožny tydzień źjaŭlajucca novyja pupyški. Jašče litaralna miesiac — i ŭsio budzie zialonaje.
Ale pry hetym Puzankova nie admaŭlaje, što niejkija raśliny mahli zahinuć: u adpaviednaści z normami dapuskajecca naturalny adpad da 10% vysadžanych dreŭ.
— Jakija drevy nie pryžylisia — treba hladzieć u červieni. Heta my viedajem pa vopytu ŭžo nie adnaho hoda.
Puzankova kaža, što pytańnie jany vyvučali ź Instytutam ekśpierymientalnaj bataniki: drevam nieabchodny čas, kab adnavicca paśla zimovaha pieryjadu.
Što ž tyčycca fatahrafij, na jakich možna pabačyć zahinułyja ihličnyja, to tut sprava ŭ tym, što ich vysadžvaŭ nie «Minskzielanbud», a raźmieščanyja ŭzdoŭž kalcavoj pradpryjemstvy, tłumačyć śpiecyjalist. Naprykład, zapraŭki. Puzankova kaža, što jany nie rekamiendavali im hetaha rabić.
— Ale mnohija drevy raźmieščany daloka ad kalcavoj. Na ich taksama ŭździejničaje sol?
— Pavodle daśledavańnia, jakoje pravodziłasia niekalki hadoŭ tamu z udziełam Akademii navuk, čym bolšaja chutkaść ruchu, tym dalej raźlot solevych paroŭ. Mašyna jedzie, utvarajecca solevy tuman, i hety tuman raźlatajecca da 150 mietraŭ, asiadajučy na halinkach.
