Chto taki Hieła Halski — «złodziej u zakonie», jakoha asudzili ŭ Minsku
Hieła Kardava (jon ža Hieła Halski) atrymaŭ 3 hady kałonii ahulnaha režymu. Sud Kastryčnickaha rajona Minska pryznaŭ, što Kardava vinavaty ŭ vykarystańni padroblenych dakumientaŭ.
Hieła Kardava
Nahadajem, što hramadzianina Hruzii Hiełu Kardavu zatrymali ŭ minskim aeraporcie ŭ studzieni. Paviedamlałasia, što jon źbiraŭsia vylecieć u Turcyju z rasijskim pašpartam na imia Dačy Habunija dla ŭdziełu ŭ schodcy złodziejaŭ.
Razam ź im byŭ jašče adzin «karanavany złodziej» z Hruzii — Suliko Šarykadze (Suliko Suchumski). Šarykadze departavali ź Biełarusi, a Kardavu źmiaścili ŭ SIZA. Ciapier sud vyrašyŭ, što bližejšyja try hady Hieła praviadzie ŭ biełaruskaj kałonii.
Cikava, što dla 44-hadovaha Kardavy heta pieršaja sudzimaść.
Raniej jon uvachodziŭ u hrupoŭku «Dzieda Chasana» (Asłan Usajan, viadomy kryminalny aŭtarytet, jakoha zabili ŭ 2013 hodzie). Paśla śmierci Usajana Kardava pačaŭ hublać aŭtarytet.
U 2013 hodzie Kardavu pradjaŭlalisia pretenzii, što jon ŭdzielničaje ŭ tak zvanych «kamiercyjnych karanacyjach» — to bok za hrošy nadzialaje zvańniem «złodzieja ŭ zakonie». Padobnyja «schodki» pravodzilisia, jak praviła, za miažoj. Na adnoj ź ich, u Dubai, karanavali adrazu 16 čałaviek. Ale paśla maładyja «złodziei ŭ zakonie» pačali atrymlivać pahrozy ad bolš aŭtarytetnych «kaleh», u vyniku dvoje maładych «złodziejaŭ» navat admovilisia ad zvańniaŭ.
A paśla «staryki» prypynili paŭnamoctvy samoha Hieły, pisaŭ «Rosbałt». Jon namahaŭsia ich adnavić, ale nie atrymlivałasia.
Zatym Kardava byŭ zatrymany siłavikami i vysłany z Rasii, jamu zabaranili ŭjezd u krainu na 5 hadoŭ. A ŭ 2017 hodzie Kardavu zatrymali kijeŭskija siłaviki. Vyśvietliłasia, što jon mieŭ falšyvy pašpart na imia uradženca Simfieropala Aleha Hałomba i pa im naviedvaŭ Rasiju.
Darečy, paśla zatrymańnia Hieły ministr unutranych spraŭ Ukrainy Avakaŭ zajaviŭ, što Kardava — ahienturny supracoŭnik MUS Rasii i aktyŭna supracoŭničaje z rasijskimi śpiecsłužbami. Taksama paviedamlałasia, što Kardava maje dačynieńnie da šerahu złačynstvaŭ na terytoryi Ukrainy. Praŭda, tady skončyłasia ŭsio departacyjaj.
