«Nie reahavać nie mieli prava». Šunievič — pra kamientar MUS z nahody ŁHBT-ściaha na pasolstvie Brytanii
MUS abaviazana było prareahavać na źjaŭleńnie ŁHBT-ściaha na budynku pasolstva Vialikabrytanii ŭ Minsku. Pra heta ŭ efiry telekanała «Biełaruś 1» zajaviŭ kiraŭnik viedamstva Ihar Šunievič, piša Tut.by
— Nie reahavać na padobnaha rodu padziei my nie majem nijakaha prava, — zajaviŭ Ihar Šunievič, adkazvajučy na pytańnie žurnalista z nahody zajavy, raźmieščanaj na sajcie MUS u minułuju niadzielu.
Ihar Šunievič adznačyŭ, što heta «ŭnutranaja sprava, u tym liku i našaha ministerstva». Tamu padnačalenych jamu viedamstva nie mahło pakinuć biez uvahi źjaŭleńnie na budynku ambasady hetaha «atrybutu» (tak ministr nazvaŭ ŁHBT-ściah).
— Ja heta nazyvaju prapahandaj taho ładu žyćcia, jaki nam nieprymalny. Heta asnoŭny matyŭ, jaki zaachvociŭ nas praź niekatory čas dać svoj kamientar, — rastłumačyŭ Šunievič.
Ministr taksama adznačyŭ, što siońnia vostra staić prablema praniknieńnia ŭ naša hramadstva «nieŭłaścivych, nienaturalnych i inšych destruktyŭnych asablivaściaŭ, ideałohij» i «vialikich imunitetaŭ hetamu, akramia našaj historyi i relihii, niama».
Nahadajem, 20 maja na sajcie MUS byŭ raźmieščany kamientar, datyčny dziejańniaŭ pasolstva Vialikabrytanii, jakoje 17 maja, u Mižnarodny dzień baraćby z hamafobijaj, transfobii i bifobijaj, vyviesiła ściah ŁHBT.
U im baraćba ŁHBT-supolnaści za svaje pravy była nazvanaja padrobkaj, jak i sami adnapołyja adnosiny.
MUS taksama adznačyła, što «pieravažnaja bolšaść biełarusaŭ prytrymlivajecca tradycyjnych siamiejnych kaštoŭnaściaŭ, u tym liku chryścijanskich», tamu zajavy padobnaha rodu — vyklik hetych kaštoŭnaściam. My — za sapraŭdnaje, jany nie projduć! - reziumavali ŭ siłavym viedamstvie.
