U stolinskaj balnicy pamierła žančyna: trapiła ŭ komu paśla ŭkołu antybijotyku. Iznoŭ ceftryjakson
45-hadovaja Śniažana Špakoŭskaja lahła 18 maja na hiniekałahičnuju apieracyju ŭ Stolinskuju rajonnuju balnicu. Apieracyja prajšła paśpiachova. Ale potym zdaryłasia biada.
U Śniažany Špakoŭskaj było troje dziaciej.
«Tam ničoha surjoznaha nie było. Maleńkaja apieracyja — vydalili palip, i ŭsio, — kažuć svajaki Śniažany. — Paśla taksama ŭsio było dobra. U piatnicu ŭviečary jana pazvaniła dačce ŭ Maskvu, skazała, što idzie na ŭkoł. I ŭsio».
Paśla ŭkołu žančynie stała kiepska, raskazvajuć svajaki. Jana pajšła ŭ prybiralniu, dumała, što vanituje. Adnak tam pačała zadychacca, zakryčała, pačała klikać na dapamohu. Prybieh piersanał balnicy, Śniažanu pavieźli ŭ reanimacyju.
Zatym jana trapiła ŭ komu, ź jakoj tak i nie vyjšła, kažuć svajaki. Daktary ratavali Śniažanu ŭsiu noč, niekalki razoŭ u žančyny spyniałasia serca, jaho zavodzili iznoŭ. Ale ranicaj 19 maja, u subotu, Špakoŭskaja pamierła.
Pa infarmacyi «Našaj Nivy», žančynie kałoli ceftryjakson — antybijotyk. Jon niaredka vykarystoŭvajecca paśla apieracyj dla prafiłaktyki infiekcyj.
«Śniažana była žančyna-žyŭčyk. Poŭnaja enierhii i vielmi zdarovaja. Akramia stamatołahaŭ, da daktaroŭ nie chadziła, nikoli ni na što nie chvareła, — raskazvajuć svajaki Špakoŭskaj. — Ale jana była vielmi prablemnym alerhikam. Pra toje i jana ŭsim kazała pastajanna, i ŭ miedkartcy ŭ jaje byŭ zapis. Daktary pra alerhii musili viedać».
Darečy, u reakcyjach, jakija moža vyklikać ceftryjakson, — jakraz anafiłaktyčny šok.
Ale Piatro Paškievič, hałoŭny doktar stolinskaj balnicy, zapeŭnivaje: u miedycynskich dakumientach Špakoŭskaj nie było infarmacyi, što ŭ žančyny alerhija na jakija-niebudź leki.
«Pakul vysnovy rabić rana. U nas uvieś dzień 19 maja była kamisija Ministerstva achovy zdaroŭja. Pytańnie budzie jašče razhladacca, chutčej za ŭsio, navat u ministra. Ale ŭ miedycynskaj dakumientacyi Špakoŭskaj pra alerhiju na miedpreparaty ničoha nie było, — raspavioŭ «Našaj Nivie» Paškievič. — U pryncypie, luby preparat moža vyklikać alerhičnuju reakcyju, ale heta, chutčej, zaležyć ad asablivaściej arhanizma, čym ad preparata».
U svaju čarhu Alaksiej, muž Špakoŭskaj, kaža, što kaliści Śniažana staviła ŭnuku ŭkoł ceftryjaksonu. I ad kantaktu skury z preparatam u jaje adrazu pačałasia reakcyja — tvar pajšoŭ čyrvonymi plamami.
«Nieviadoma, ci spytali ŭ jaje pra alerhii i prablemy ź miedykamientami. Ci papiaredzili daktary, što joj buduć kałoć toj ceftryjakson? Bo jana b abaviazkova skazała, što mohuć być prablemy», — upeŭnieny Alaksiej.
«Adzinaje, što pakul mahu ščyra zajavić, heta toje, što doktar namahaŭsia jakasna akazać miedycynskuju dapamohu», — kaža Piotr Paškievič.
Dalejšyja vysnovy musiać zrabić kamisii, ekśpiertyzy i śledčyja. Muž Śniažany ŭžo napisaŭ zajavu ŭ Śledčy kamitet, u balnicy zabrali dakumientacyju.
«Ale ja nie chaču, kab kahości pasadzili. Chaču, kab u budučyni takoha bolš nie zdarałasia. Chaj hladziać i dumajuć pra nastupstvy, — kaža Alaksiej. — Chaču, kab trochi mazhami dumali».
Śniažanu Špakoŭskuju pachavali dniom 21 maja. U jaje zastałosia troje darosłych dziaciej i šaściora ŭnukaŭ.
Adznačym, što ŭskładnieńni paśla prymianieńnia ceftryjaksonu nie raz zdaralisia i letaś.
Treci vypadak za tydzień: u Hancavičach ratavali dziaŭčynku paśla ŭkołu ceftryjaksonu
Barysaŭski školnik patrapiŭ u reanimacyju paśla injekcyi rasijskaha antybijotyku
