Viasiołyja historyi pra haradskoje dziacinstva ŭ malunkach: prajšła prezientacyja «Kazak staroha Adamkova»
Piśmieńnica Natałka Charytaniuk i mastačka Vola Kuźmič prezientavali ŭ čaćvier 17 traŭnia ŭ minskaj halerei «Art-Biełaruś» ilustravanuju knihu historyj dla dziaciej i darosłych «Kazki staroha Adamkova». Prezientacyja prajšła ŭ supravadžeńni vystavy ilustracyj Voli Kuźmič.
Fota: Juryj Sidun
«Voś tolki ŭziała ŭ ruki, hartaju dy ŭžo ščaślivaja ad taho, jak ža jakasna heta zroblena!» — hučna dzielicca ź siabroŭkaj uražańniami adna z maładych mam, jakaja padtrymała vydańnie knihi i pryjšła na prezientacyju. «Składana znajści ŭ Biełarusi knihu, zroblenuju tut na našaj movie, u jakoj usio supadaje: i tekst zachoplivaje, i ilustracyi hruntoŭnyja, i kniha nie razvalvajecca ŭ rukach maleńkich čytačoŭ».
«Biez kampramisaŭ da jakaści» — heta adzin z pryncypaŭ u stvareńni «Kazak staroha Adamkova», u jakich zhavarylisia piśmieńnica Natałka Charytaniuk i mastačka Vola Kuźmič. Pryncyp udałosia realizavać uvažlivaj pracaj i nie biez cudaŭ.
Fota: Juryj Sidun
U pačatku kraŭdfandynhavaj kampanii aŭtarki płanavali, jak buduć šmatkrokava paśladoŭna i tvorča raskazvać patencyjnym čytačam-sponsaram, čamu važna tvory pieraŭtvarać u jakasnyja pradukty dla biełaruskich dzietak i ich baćkoŭ. Ale nieabchodnaja dla vydańnia suma była imkliva sabranaja ŭžo litaralna na pieršym kroku. Na treci dzień paśla publikacyi videa, u jakim dziaŭčaty raspaviadali pra start kampanii i pradstavili svaju zadumu, ličba sabranych srodkaŭ na płatformie «Talaka» pieravysiła 100%.
Padtrymka čytačoŭ i sponsaraŭ dazvoliła aŭtarkam uvasobić svaje samyja ambitnyja mary i płany. Try kazki raźmiaścilisia na 44 poŭnakalarovych ščylnych staronkach vialikim farmatam, a kožny razhort knihi źmiaščaje detalizavanyja vialikija siužetnyja ilustracyi.
Fota: Juryj Sidun
Na prezientacyju ŭ minskaj halerei «Art-Biełaruś» u čaćvier 17 traŭnia pryjšli siemji ź dziećmi, piśmieńniki i mastaki. Uračystuju imprezu ad imia halerei adkryŭ Alaksandr Zimienka, kandydat mastactvaznaŭstva i kuratar karparatyŭnaj kalekcyi Biełhazprambanka. Piśmieńnik i mastak Adam Hłobus paśla natchnialnaj pramovy pra kazki i litaraturu, prezientavaŭ Natalli i Voli knihu «Kazimir Malevič dla dziaciej», jakaja taksama była sioleta vydadzienaja praz padtrymku čytačoŭ. Redaktarka knihi piśmieńnica Maryja Martysievič pačytała viasiołyja pravakacyjnyja vieršy pra dzietak. Aŭtarak taksama pryjšoŭ pavinšavać Źmicier Daškievič, kampanija «Ceślary» jakoha stała adnym z hałoŭnych sponsaraŭ vydańnia knihi.
«A jak ža biez mulcikaŭ?!» — abradvała dzietak na prezientacyi mastačka Vola Kuźmič.
Doŭhija čatyry miesiacy pracy nad knihaj aŭtarki prezientavali aŭdytoryi ŭ karotkim roliku z multyplikacyjaj, videa i fotazdymkami.
Kniha «Kazki staroha Adamkova» dastupnaja ŭ prodažy ŭ kniharni Łohvinaŭ, halerei «Art-Biełaruś» i kramie Symbal.by.
