«Rumołaviec», vykładčyk BDU paskardziŭsia patryjarchu Kiryłu na biełaruskamoŭnych pravasłaŭnych śviataroŭ
Adzin z čarnasocienskich resursaŭ, jaki redahuje zachodnierusist, prafiesar BUKM Leŭ Kryštapovič, źmiaściŭ u siabie artykuł pad nazvaj «Siarhiej Lepin nazvaŭ udzielnikaŭ «Nieśmiarotnaha pałka» fašystami i pahražaŭ im zvalnieńniami».
Alaksandr Babuk. Fota z vk.com.
Jaho aŭtaram vystupiŭ vykładčyk fakulteta mižnarodnych adnosin BDU Alaksandr Babuk, jaki źjaŭlajecca prychadžaninam Minskaha Śviata-Duchavaha kafiedralnaha sabora. Hety list Babuk nakiravaŭ patryjarchu Maskoŭskamu i ŭsioj Rusi Kiryłu.
Babuk piša, što ad 1991 u Biełarusi nazirajecca ŭmacavańnie nacyjanalistyčnych nastrojaŭ, nakiravanych na razbureńnie «Śviatoj Rusi». «Ja sam rodam z Hrodna, zachodniaj častki Biełarusi. Histaryčna Hrodzienski rehijon naležyć Čornaj Rusi, i heta miesca, dzie farmujucca i vychoŭvajucca mocnyja ducham ludzi, pakolki ich žyćcio praciakaje na ŭłońni sutyknieńnia pravasłaŭnaha ruskaha i polskaha katalickaha śvietaŭ», — piša Babuk.
Aŭtar adznačaje, što apošnim časam «nacyjanalistyčnyja nastroi» prajaŭlajucca i va ŭłońni BPC. «U samoj biełaruskaj movie ničoha drennaha niama, adnak jaje niekatoryja našy kliryki vykarystoŭvajuć jak instrumient palityčnaj hulni suprać ahulnaruskaha duchoŭnaha adzinstva. Kali jašče 10 hadoŭ nabaženstvy ŭ chramach Hrodna prachodzili na biełaruskaj movie raz na miesiac, i heta, pa vialikim rachunku, zadavalniała jak tych, chto vystupaje prychilnikam biełaruskaj movy, tak i tych, kamu padabajecca carkoŭnasłavianskaja, to siońnia słužby na biełaruskaj movie prachodziać štotydzień, i prychadžanie navat skardziacca duchavienstvu pra toje, što mova prosta naviazvajecca štučna, pakolki viernikaŭ pra heta nie pytajucca», — adznačaje Babuk.
Jon nazyvaje imiony śviataroŭ, jakija, na jahonuju dumku, pravodziać «hvałtoŭnuju biełarusizacyju» pravasłaŭnaha žyćcia ŭ Hrodnie: heta nastajaciel sabora Usich Biełaruskich Śviatych Anatol Nienartovič i nastajaciel Śviata-Pakroŭskaha kafiedralnaha sabora Hieorhij Roj: «Volna ci niavolna jany prymušajuć ludziej pierachodzić na biełaruskuju, ihnarujučy ruskuju movu».
«Ja maju prava razmaŭlać ź ludźmi na svajoj rodnaj movie. Kali niechta sa mnoj havoryć pa-rusku, to ja nie liču ž heta prymusovaj rusifikacyjaj. Ja liču biełaruskuju movu rodnaj movaj našaha naroda. I ŭ štodzionnym žyćci ja razmaŭlaju pa-biełarusku i propaviedzi kažu pa-biełarusku i nie baču ŭ hetym prablemy. Ź dziesiaci śviataroŭ sabora tolki adzin prapavieduje pa-biełarusku. Ci možna heta nazvać prymusovaj biełarusizacyjaj? Ja, jak nastajaciel, nikoha nie prymušaju havaryć pa-biełarusku. Kožny śviatar abiraje sabie movu, jakoj jamu lahčej havaryć. Heta takija biazhłuzdyja abvinavačvańni», — kaža ajciec Hieorhij Roj.
Hieorhij Roj. Fota z facebook.com.
«Ciapier šmat ludziej paškodžanyja roznaj prapahandaj i ideałohijaj. Jość ludzi, jakija chvaravita ŭsprymajuć roznyja źjavy našaha žyćcia. Ja znajomy z Alaksandram Babukom, heta taki niepryjemny kantekst. My narmalna stasavalisia. U nas pry sabory jość inicyjatyva «Kłub pravasłaŭnaj razmovy», šmat havorym pra litaraturu. Kali jon kaža pra prymusovuju biełarusizacyju, to čamu jon vystupaŭ u nas u sabory i razmaŭlaŭ pra Dastajeŭskaha? Ja što, prymušaŭ jaho havaryć pa-biełarusku? Vielmi niepryjemna čuć i čytać takija słovy. Ja navat nie kažu pra chryścijanski kantekst, heta taki kłasičny paklop», — raskazvaje hrodzienski śviatar.
Ale samaja vialikaja častka ŭ zvarocie addadziena ajcu Siarhieju Lepinu, jaki ad imia BPC vystupaŭ na śviatkavańni Dnia Voli, 25 sakavika. «Sioleta ja ŭpieršyniu ŭ Dzień Pieramohi 9 maja pryniaŭ udzieł u akcyi «Nieśmiarotny połk». Ajciec Siarhiej u pryvatnaj hutarcy nie prosta nazvaŭ udzielnikaŭ «Nieśmiarotnaha pałka» fašystami, ale i ŭ pierapiscy pahražaŭ im zvalnieńniami z pracoŭnych miescaŭ. Stužku Sv.Hieorhija, jakaja paŭtaraje simvoliku vajennaha duchavienstva Ruskaj Carkvy, jon nazvaŭ «fašysckaj simvolikaj». Atrymlivajecca, što, kali čałaviek udzielničaje ŭ akcyi «Nieśmiarotny połk» z hieorhijeŭskaj stužkaj na hrudziach, jaho za heta treba nazyvać fašystam? Heta — paskudny paklop», — piša Babuk.
Naprykancy Alaksandr Babuk prosić ucarković i maksimalna aktyvizavać pravasłaŭny ŭdzieł u «Nieśmiarotnym pałku».
My parazmaŭlali z staršynioj Sinadalnaha infarmacyjnaha adździełu BPC ajcom Siarhiejem Lepinym pra hetuju situacyju.
Siarhiej Lepin. Fota aif.by.
«Sapraŭdy, padobna da paklopu. Navat nie vierycca, što heta jon napisaŭ. Kryŭdna, što hety čałaviek razam z nami nie adzin hod jeŭ dy piŭ. Jen byŭ da nas nie zvyčajnym prychadžaninam, a kimści bolšym. U jaho była biaskoncaja mahčymaść asabista papytacca, što niezrazumieła, vykazać niazhodu, paspračacca…
My lubili jaho i vielmi pieražyvali za jaho asabistyja prablemy. Kali jaho ŭbačyŭ siarod kałony «Nieśmiarotnaha pałku» ź simvolikaj «Rusi maładoj», to napisaŭ jamu siabroŭski list z paradaj być aściarožnym. Bo adnosiny dla vykładčyka VNU z arhanizacyjaj, jakaja maje nacysckija simvały i ŭznačalvajecca pahanskim žracom z nacysckaj ideałohijaj, jak mnie zdajecca, niebiaśpiečnaja.
Alaksandr Babuk z uźniataj rukoj u majcy «Rusi maładoj». Fota onliner.by.
Ja nie mieŭ na ŭvazie «hieorhijeŭskuju stužku» — ja havaryŭ mienavita pra emblemu, jakaja była na čyrvonych rumołaŭskich majkach. Nie viedaju, mo niešta źmianiłasia, i ŭ nadziei vykažu zdahadku, što lidar hetaj supołki ŭžo zrabiŭsia chryścijaninam, ale minimum simvały zastalisia tyja ž samyja. I tut raptam takoje… Alaksandr abvinavaciŭ mianie, što ja pahražaŭ… Sumna. Ja nie pieršy hod viedaŭ Babuka, viedaŭ i jahonyja pohlady. Ale ja śviatar, ja hlažu na ludziej pavierch ich subjektyunaści — jon byŭ dy i zastajecca dla mianie bratam u Chryście. Ja nikoli nie padzialaŭ asabistych pohladaŭ Sašy i zaraz dystancujusia ad jahonaj zdradnickaj chłuśni, ale ŭsio roŭna nie admaŭlajusia ad jaho asabista. Chaj Haspodź źlitujecca nad usimi nami», — kaža ajciec Siarhiej.
My spytali, ci nie zdajecca śviataru, što paśla 25 Sakavika suprać jaho viadziecca ataka roznymi čarnasocienskimi sajtami? «Čamu zdajecca? Tak i jość. Na ŭsio vola Božaja. Ja budu adkazvać na ŭsio tolki spravami. Byli paklopy, praklony, navat fizyčnyja pahrozy — heta kaštuje niervaŭ, tak, ale ja atrymaŭ słovaŭ padtrymki bolej, čym abvinavačvańniaŭ — heta natchniaje».
Ci nie škaduje Siarhiej Lepin, što vystupiŭ 25 sakavika la Opiernaha? «Nie. Dziakuj Bohu, što ŭ mianie była takaja niezvyčajnaja mahčymaść zaklikać usich da chryścijanskaj lubovi i hramadzianskaj zhody, dobrasusiedskaj pavahi dy nabyćcia svabody ŭ Chryście. Rablu heta jašče raz».
Alaksandr Babuk u 2009 hodzie skončyŭ Hrodzienski dziaržaŭny ŭniviersitet pa śpiecyjalnaści «sučasnyja zamiežnyja movy», u 2010 — mahistraturu «Hiermanskija movy». Uvachodzić u abjadnańnie pravasłaŭnych navukoŭcaŭ. U sacyjalnych sietkach pazicyjanuje siabie jak kazak.
