Hierojaŭ paŭstańnia Kalinoŭskaha pachavajuć u Vilni bieź biełaruskaj delehacyi
Vyjaŭlenyja na Zamkavaj hary ŭ Vilni pareštki paŭstancaŭ Kalinoŭskaha buduć pachavanyja na vilenskich mohiłkach «Rosy». Takoje rašeńnie abviaściła litoŭskaja ŭradavaja kamisija, piša Radyjo Svaboda sa spasyłkaj na wilnoteka.lt.
Cyrymonija adbudziecca ŭ lipieni abo žniŭni 2019 hodu z udziełam pradstaŭnikoŭ polskaha boku i budzie mieć relihijny charaktar.
«My planujem arhanizavać supolnyja ŭračystaści z polskim bokam, dla Polščy heta taksama vielmi važna, a z histaryčnaha punktu hledžańnia mahčyma i važniej, čym dla nas», — skazaŭ vice-kancler uradu Litvy Dejvidas Matulonis.
Siarod dvuch mahčymych varyjantaŭ miesca była abaranaja kaplica na «Rosach». Inšyja varyjantam była kaplica ŭ kaściole śviatych Filipa i Jakuba na Łukiskaj płoščy, dzie jany byli pakaranyja śmierciu.
«Heta budzie svojeasablivy panteon kiraŭnikoŭ paŭstańnia 1863-64 hadoŭ», — skazaŭ Matulonis.
Viadoma, što ŭ 1863-64 hadach na Łukiskaj płoščy byli pakaranyja śmierciu 21 lider i ŭdzielnik paŭstańnia Kalinoŭskaha. Na Zamkavaj hary da hetaha času byli vyjaŭlenyja pareštki 17 ź ich. 13 ciełaŭ užo ŭdałosia identyfikavać.
Navukoŭcy pierakananyja, što nia majuć sumnievu nakont pareštkaŭ Zyhmunta Sierakoŭskaha. Pry im byŭ znojdzieny piarścionak z vyhraviravanymi imionami — Zyhmunt i Apalonija, a taksama data šlubu — 1862 hod: «Zygmund Apolonija 11 Sierpnia / 30 Lipca 1862 r.». Pra pakarańnie śmierciu inšaha paŭstanca na imia Zyhmunt navukoŭcam nieviadoma.
Čytajcie taksama: Znojdzienyja pareštki Zyhmunta Sierakoŭskaha? Pra heta śviedčyć piarścionak
Pareštki samoha Kastusia Kalinoŭskaha pakul nie identyfikavanyja da kanca. Pavodle prarektara Vilenskaha ŭniversytetu, prafesara medyčnaha fakultetu Rymantasa Jankaŭskasa, «jość realny kandydat, ale pakul nielha na 100% skazać, što heta pareštki Kalinoŭskaha».
U červieni pačynajucca čarhovyja pošuki pareštkaŭ nia znojdzienych dahetul čatyroch z 21 paŭstanca, jakija byli pakaranyja śmierciu na Łukiskaj płoščy.
