Prezientacyju zakonaprajekta ab achovie i vykarystańni bieła-čyrvona-biełaha ściaha sprabavaŭ sarvać pravakatar FOTY
Paśla čarady niaŭdałych sprob nadać bieła-čyrvona-biełamu ściahu status histaryčna-kulturnaj kaštoŭnaści praź Ministerstva kultury, sposabam zboru podpisaŭ i inšymi šlachami, było vyrašana raspačać kampaniju ab padrychtoŭcy tematyčnaha zakona.
Prezientacyja zakonaprajekta, jaki deputatka Hanna Kanapackaja pieradaść na razhlad u Pałatu pradstaŭnikoŭ, adbyłasia ŭ simvaličny dzień: 14 maja. Mienavita ŭ hety dzień u 1995 hodzie u Biełarusi adbyŭsia refierendum, u vyniku jakoha histaryčnuju simvoliku zamianili na siońniašni čyrvona-zialony varyjant.
Hanna Kanapackaja, adzinaja deputatka ŭ parłamiencie, jakaja vykarystoŭvaje bieła-čyrvona-bieły ściah i vystupaje za toje, kab jamu nadali status historyka-kulturnaj kaštoŭnaści.
Asnoŭnyja artykuły zakonaprajekta hučać nastupnym čynam. Bieła-čyrvona-bieły ściah źjaŭlaŭsia aficyjnym dziaržaŭnym simvałam RB u pieryjad z 19 vieraśnia 1991 hoda pa 6 červienia 1995 hoda. Jaho možna svabodna vykarystoŭvać hramadzianam, a taksama zamiežnymi hramadzianam, jakija znachodziacca na terytoryi Biełarusi, i asobami biez hramadzianstva.
Usie pavinny pavažliva stavicca da pieršaha dziaržaŭnaha simvała RB, stvareńnie pieraškod jaho pravamiernamu vykarystańniu i jaho źniavaha ciahnuć za saboj adkaznaść u adpaviednaści z zakanadaŭstvam.
Na ŭvachodzie ŭ kanhres-choł hatelu «Viktoryja» ŭsie žadajučyja mahli padpisacca ŭ padtrymku zakonaprajekta.
Raspačałasia prezientacyja vykanańniem himna «My vyjdziem ščylnymi radami» prysutnymi.
Historyk Aleh Trusaŭ, jaki ŭ 1991 hodzie byŭ siabram parłamienta i ŭvachodziŭ ŭ lik tych, chto prymaŭ rašeńnie ab zaćviardžeńni hierba «Pahonia» i bieła-čyrvona-biełaha ściaha ŭ jakaści dziaržaŭnych simvałaŭ Biełarusi adznačyŭ:
«Nie sumniajusia, što my dažyviom da taho času, kali naš ściah znoŭ stanie dziaržaŭnym».
Palityk Lavon Barščeŭski ŭ svaju čarhu dadaŭ, što dla hetaha navat nie treba było b prymać novy zakon. Pa-dobramu Kanstytucyjnamu sudu Biełarusi prosta treba pryznać rašeńni refierenduma 1995 hoda niezakonnymi.
Lavon Barščeŭski, Aleh Trusaŭ i Alena Anisim.
Pavieł Biełavus, kiraŭnik «Art-Siadziby», padzialiŭsia raniejšaj niaŭdałaj sprobaj dyjałohu z aficyjnymi dziaržaŭnymi strukturami pa hetaj temie:
«Dla ich heta nie abhruntavana, bo heta niezarehistravanaja simvolika (chacia jak moža być niezarehistravanaj simvolika, jakaja była dziaržaŭnaj?), tamu my vyrašyli stvaryć novy precedent.
Hetuju inicyjatyvu nam nichto na vuška nie našaptaŭ. Što atrymajecca, my nie viedajem, ale sprabavać treba. Rašeńnie Kanstytucyjnaha suda my nie možam źmianić, ale ŭ parłamiencie ŭ nas jość svaje deputaty, jakija pasprabujuć inicyjavać patrebny nam zakon».
Prezentacyju sprabavaŭ sarvać mužčyna, jaki pradstaviŭsia jak «Andrej Vinahradaŭ, kiraŭnik minskaj hrupy «Sajuza ruskaha naroda». Ale zała zahłušyła jaho apładysmientami i Vinahradava siłaj vyvieli sa sceny.
Mužčyna, jaki sprabavaŭ sarvać mierapryjemstva.
Skončyłasia prezientacyja solnym vystupam Lavona Volskaha.
Lavon Volski. Pad jaho «Try čarapachi» ŭ kancy ŭsie śpiavali i tančyli.
Navošta nam patrebny zakon «Ab vykarystańni i achovie pieršaha dziaržaŭnaha ściaha Respubliki Biełaruś», dumajem, i tłumačyć nie treba. Ale dla tych, chto zadajecca takim pytańniem, Pavieł Biełavus sfarmulavaŭ vydatnyja tezisy.
