Duma pra Biełuju Ruś
Napiaredadni takoj hlabalnaj, nie raŭnujučy finansavy kryzis, takoj histaryčnaj padziei — źjezdu hramadzkaha abjadnańnia «Biełaja Ruś», u hałavu pryjšło niekalki dumak. Feljeton Lolika Uškina.
Napiaredadni takoj hlabalnaj, nie raŭnujučy finansavy kryzis, takoj histaryčnaj padziei — źjezdu hramadzkaha abjadnańnia «Biełaja Ruś», u hałavu pryjšło niekalki dumak. Feljeton Lolika Uškina.
1. Biełaruś znoŭ pazabaviła śviet. Kali va ŭsich krainach ułada trymajecca na partyjnych strukturach — adsiul vyraz «partyja ŭłady» — to naš režym vyrašyŭ stvarać siabie bazu na hramadzkim abjadnańni. Vychodzić nia partyja ŭłady, a NŽO ŭłady.
2. Jak viadoma, BRSM u narodzie prazvali «łukamoł». Adsiul cikavaje pytańnie: jak buduć nazyvać siabroŭ «Biełaj Rusi»? Niaŭžo stanuć za vočy nazyvać «łukastary»? Inšy varyjant z prajekcyjaj na hiendernyja zababony — «łukadziadźki» abo «łukacioćki». Mahčyma taksama — «łukadziedy» ci «łukababki».
3. Jašče adzin varyjant — prosta «biełyja». Adrazu narod zaparalelić sytuacyju na anekdoty pra Piećku i Ivan Ivanyča. «Vasil Ivanavič, biełyja iduć!» — «Spakojna, Piećka, my ŭžo prahałasavali daterminova».
4. Jak hanaracca baćki‑zasnavalniki prajektu, minimum 50% deputataŭ pałatki ŭvojduć u skład «Biełaj Rusi», što faktyčna značyć farmavańnie pravobrazu niejkaj frakcyi. Kali siarod parlamentaroŭ jość siabry inšych hramadzkich abjadnańniaŭ, kštałtu Tavarystva palaŭničych i rybakoŭ abo Abjadnańnia dapamohi pažarnikam, jany taksama aŭtamatyčna majuć sfarmavać frakcyi. Narešcie ŭ nas budzie mižfrakcyjnaja formuła ŭtvareńnia Saŭminu! Z budučych paviedamleńniaŭ BiełTA: «Paśla taho jak donary i amatary ptušak pakinuli kabinet, urad Sidorskaha ruchnuŭ».
5. Jak siabry pracoŭnych kalektyvaŭ buduć dzialicca na tych, chto maje być siabram BRSM, a chto siabram HA «Biełaja Ruś»? U aficyjnaj presie byŭ tezis ab tym, što ŭ HA «Biełaja Ruś» buduć nabirać vyklučna tych, kamu ŭžo za 35 hadoŭ. Tema nastupnaja: pakolki siabrami BRSM ludzi starejšaha vieku aficyjna być nia mohuć, a tak chočacca budavać kvitniejučuju Biełaruś, jany stvaryli HA «RB». Ci nie było dla dziaržavy tańniej dazvolić ludziam zastavacca ŭ BRSM da samaj śmierci?
6. Sponsar BRSM i HA «Biełaja Ruś» adzin i toj ža. Ci nia ŭźniknie pamiž imi kankurencyi za datacyi? U jakoj formie jana budzie adbyvacca? Jak, skažam, siabry BRSM buduć pierakonvać ułady ŭ tym, što jany bolš karysnyja za HA «RB»? Kazać u administracyi niešta kštałtu: «BRSM maje prava na bolšy paj ź biudžetu. Pahladzicie, siabry «Biełaj Rusi» trymali na pikiecie amerykanskaj ambasady tolki dva transparanty, a našy — try transparanty i šaryk». Ci nia varta arhanizacyjam adrazu padpisać mirnuju kanvencyju i padzialić krainu na ekspluatacyjnyja ŭčastki?
7. Jak viadoma, adzin ź siabroŭ inicyjatyŭnaj hrupy HA «Biełaja Ruś», dyrektar rynku ŭ Ždanovičach letam trapiŭ u turmu byccam za niejkija afery. Cikava, ci razhladała śledčaja hrupa «bieły ruski» śled? Pa lohicy: milicyja pavinna była była pravieryć usie kantakty patencyjnaha złačyncy. Voś by pahladzieć na hety dopyt! Śledčy: Tavaryš Radźkoŭ (časovy kiraŭnik HA «RB») davajcie nie zalivać mnie pra toje, što na sustrečach inicyjatyŭnaj hrupy vy havaryli pra luboŭ da Baćki. U vočy hladzieć, ja skazaŭ. Što ty viedaješ pra «levyja» pastaŭki šyrspažyvu na Ždanovičy?».
8. HA «RB» klaniecca, što budzie pracavać pa pryncypie «nijakaha farmalizmu». Vielmi chočacca pabačyć u reale metodyku pracy hetych raźniavolenych aktyvistaŭ. Kštałtu: «Vasia, chadziem viečaram u restaran abo ŭ kino. Chaču ŭ ciopłaj niefarmalnaj atmasfery najechać na ciabie: abo zvalniajem ciabie z pracy, abo padpišaśsia na «Saŭbiełku».
Chutčej by źjezd HA «RB». Bolšaść pytańniaŭ adrazu b adpali!
