Bellingcat: Rasijskija vajskoŭcy ŭdzielničali ŭ abstrele Maryupala ŭ 2015 hodzie
Mižnarodnaja niezaležnaja daślednickaja hrupa Bellingcat zajaviła, što znajšła dokazy ŭdziełu rasijskich vajskoŭcaŭ u abstrele Maryupala ŭ studzieni 2015 hoda. Padobnuju zajavu zrabiŭ i kiraŭnik SBU.
Na svaim sajcie Bellingcat paviedamlaje, što joj udałosia vyśvietlić asoby dzieviaci rasijskich aficeraŭ, jakija prymali niepasredny ŭdzieł u hetaj apieracyi. Siarod ich — adzin hienierał, dva pałkoŭniki i try padpałkoŭniki, havorycca ŭ paviedamleńni hrupy.
Taksama śpiecyjalisty Bellingcat śćviardžajuć, što za dzień da abstrełu Maryupala z Rasii na terytoryju Ukrainy byli pierapraŭlenyja dźvie batarei rakietnych sistem załpavaha ahniu (RSZA).
Akramia taho, u Bellingcat kažuć, što vyśvietlili imiony dvuch rasijskich hienierałaŭ, jakija prymali ŭdzieł u adbory i pryznačeńni rasijskich artyleryjskich śpiecyjalistaŭ na kirujučyja pasady na ŭschodzie Ukrainy.
Kiraŭnik Słužby biaśpieki Ukrainy Vasil Hrycak u paniadziełak taksama zajaviŭ, što SBU vyśvietliła datyčnaść rasijskich vajskoŭcaŭ da abstrełu Maryupala.
Pavodle jaho słoŭ, dastaŭlenyja z Rasii dva dyvizijony RSZA «Hrad» sa składu 200-j asobnaj motastrałkovaj bryhady i 2-j Hvardziejskaj Tamanskaj motastrałkovaj dyvizii vypuścili pa Maryupalu 120 askiepkava-fuhasnych snaradaŭ.
Maryupal staŭ adnym z ačahoŭ uzbrojenaha kanfliktu na Danbasie ŭ 2014-2015 hadach. 24 studzienia 2015 hoda ŭ vyniku abstrełu žyłych rajonaŭ horada zahinuli 30 čałaviek, bolš za 100 atrymali ranieńni.