U Ministerstvie pa padatkach i zborach raspaviali ab prahresiŭnych źmienach u Padatkovym kodeksie
U intervju BiełTA namieśnik ministra pa padatkach i zborach Eła Sialickaja raskazała pra źmieny, jakija zakranuć Padatkovy kodeks.
U Biełarusi fizičnyja asoby zmohuć źviartacca ŭ lubuju padatkovuju inśpiekcyju, a nie tolki pa miescy žycharstva, jak ciapier. «Heta tak zvany eksterytaryjalny pryncyp absłuhoŭvańnia płacielščykaŭ», — raspaviała Eła Sialickaja.
U prajekcie ahulnaj častki Padatkovaha kodeksa praduhledzieli, što pamier pieni nie pavinien budzie pieravyšać sumu danaličanaha padatku (zboru).
Pa biahučaj zapazyčanaści prapanujecca takaja źmiena: kali napiaredadni parušeńnia płacielščyk na praciahu 6 miesiacaŭ svoječasova vykonvaŭ svaje padatkovyja abaviazacielstvy, to takoje prypynieńnie apieracyj budzie adbyvacca nie raniej čym praz 10 dzion paśla nadychodu terminu vypłaty.
Pa słovach Eły Sialickaj, užo padrychtavany prajekt ahulnaj častki Padatkovaha kodeksa ŭ novaj redakcyi. «Treba pačynać z ahulnych pryncypaŭ i padychodaŭ u padatkaabkładańni. Jany lahli ŭ asnovu padrychtavanaha zakonaprajekta. Razam z pryncypami ŭsieahulnaści, roŭnaści i spraviadlivaści padatkaabkładańnia heta pryncyp prezumpcyi dobrasumlennaści padatkapłacielščyka. Jon aznačaje, što pakul padatkovy orhan nie dakaža dakumientalna, što płacielščyk ździejśniŭ padatkovaje pravaparušeńnie, płacielščyk budzie ličycca dobrasumlennym. Heta asnovatvorny pryncyp, jaki siońnia zamacavany ŭ dekrecie № 7, nakiravanym na raźvićcio pradprymalnickaj dziejnaści, raźniavoleńnie dziełavoj inicyjatyvy ŭ našaj krainie», — udakładniła Eła Sialickaja.
