Kiraŭnik SK — pra śmierć sałdata, jaki zahinuŭ ad strełu tankavaha kulamiota va Uruččy: vinavatyja vyznačany
Vinavatyja ŭ niaščasnym vypadku, u vyniku jakoha zahinuŭ radavy Dźmitryj Udod, vyznačany i buduć pryciahnutyja da adkaznaści. Pra heta paviedamiŭ 6 maja staršynia Śledčaha kamiteta Ivan Naskievič, adkazvajučy na pytańni žurnalistaŭ u Breście, piša Tut.by.
Dźmitryj Udod. Fota z sacsietak
Sprava ab hibieli sałdata znachodzicca ŭ aktyŭnaj stadyi rasśledavańnia.
«Nami ŭžo vyznačany miechanizm hetaha niaščasnaha vypadku, što adbyŭsia ź im. My heta kvalifikujem jak niaščasny vypadak, ale vinavatyja asoby vyznačany, jany buduć pryciahnutyja da adkaznaści», — adznačyŭ staršynia Śledčaha kamiteta.
Dźmitryj Udod zahinuŭ 4 krasavika ŭ chodzie płanavych zaniatkaŭ pa ahniavoj padrychtoŭcy. Jak paviedamlała Ministerstva abarony, «vajskoŭcami terminovaj vajennaj słužby, jakija ŭvachodzili ŭ ekipaž BMP, byli parušanyja miery biaśpieki padčas dziejańniaŭ pry ŭzbrajeńni bajavych mašyn. U vyniku adzin z členaŭ ekipaža, staršy miechanik-kiroŭca BMP radavy Udod Dźmitryj Mikałajevič, atrymaŭ ahniastrelnaje ranieńnie, niesumiaščalnaje z žyćciom».
«Na žal, ale časam parušeńnie techniki biaśpieki pryvodzić da takich trahičnych vypadkaŭ. Ja dumaju, što my abaviazkova prainfarmujem hramadskaść, kali budzie pradjaŭlenaje abvinavačańnie», — skazaŭ Ivan Naskievič.
Raniej maci zahinułaha sałdata Alaksandra Koržyča paviedamlała, što radavy Udod prachodziŭ śviedkam pa spravie jaje syna. Kiraŭnik SK heta abvierhaje:
«Heta niapraŭda», — prakamientavaŭ jon.