Viciebsk staŭ pieršym abłasnym centram, dzie razvodziacca čaściej, čym ženiacca
Dadzienyja Biełstata za pieršy kvartał 2018 hoda zafiksavali ŭ niekatorych haradach krainy niezvyčajnuju źjavu — kolkaść razvodaŭ tut pieravysiła kolkaść šlubaŭ.
Padčas vystavy viasielnych pasłuh u Minsku. Fota Siarhieja Hudzilina.
Za pieršyja miesiacy hoda ŭ Viciebsku było zarehistravana 378 šlubaŭ i 435 razvodaŭ. Hod tamu za taki samy pieryjad situacyja była amal advarotnaja — 436 šlubaŭ i 354 razvody.
Z bujnych haradoŭ padobnaja dyspraporcyja była zafiksavana jašče ŭ Pinsku (122 šluby i 133 razvody) i Žodzina (65 šlubaŭ i 68 razvodaŭ).
U inšych rehijonach šlubaŭ usio jašče bolš, ale roźnica pamiž viasiellami i razvodami źmianšajecca.
Što stała pryčynaj takoj źjavy i čamu, najchutčej, jana budzie fiksavacca ŭsio čaściej?
Pavodle statystyki, chłopcy biaruć pieršy šlub u siarednim u 28 hadoŭ, a dziaŭčaty — amal u 26 hadoŭ. Takim čynam, ciapier u ZAHS iduć tyja, chto naradziŭsia ŭ 1990-1992 hadach. Heta čas, kali Biełaruś pačała padać u demahrafičnuju jamu.
To bok ciapier naturalnym čynam brakuje tych, chto źbirajecca žanicca.
Najbolšaja kolkaść šlubaŭ raspadajecca praz 2 hady paśla viasiella. Heta značyć, što razvodziacca tyja, chto naradziŭsia ŭ «bahatyja» 1988-1990 hady. A takich ludziej znoŭ-taki naturalna šmat.