Archivy «Kałychanki» źniščanyja na BT? Heta niapraŭda. Ale lehiendarnyja cacki adpraŭlenyja na śmietnik
Žurnalisty «Biełsata» ŭ sacyjalnych sietkach paviedamili, što na BT źniščanyja archivy «Kałychanak» — maŭlaŭ, frahmient staroha vypusku atrymałasia znajści ŭ pryvatnaj asoby, a nie na kanale.
My źviarnulisia pa tłumačeńnie niepasredna da aŭtaraŭ takoha śćvierdžańnia i na BT.
Frahmient staroj, jašče čorna-biełaj «Kałychanki», na jakoj hadavalisia tysiačy biełarusaŭ
U pres-słužbie Biełteleradyjokampanii nas zapeŭnili, što ničoha nie źniščana.
«Archiŭnyja zapisy «Kałychanki» znachodziacca na roznych nośbitach, jakija zaraz aličboŭvajucca. A fond papaŭniajecca novymi vypuskami ŭ farmacie HD», — skazała pres-sakratar Śviatłana Smałonskaja.
Adkul ža ŭźnikli takija čutki? Heta patłumačyŭ redaktar biełsataŭskaj prahramy «Kožny z nas» Jaŭhien Vałošyn.
«Sapraŭdy, śćvierdžańnie pra vydaleńnie archivaŭ było emacyjnym pierabolšvańniem.
Sprava ŭ tym, što my zaprašali na prahramu ludziej, jakija ŭ svoj čas rabili «Kałychanku», byli jaje «źviarami». I prahučali dzikija historyi, što źniščanyja lehiendarnyja lalki: Cimoška, Buślik, voŭk Vova. Ich prosta vykinuli na śmietnik, a nie addali ŭ muziej, naprykład. Taksama my sprabavali atrymać z archivaŭ zapisy «Kałychanak», ale ničoha nie atrymałasia, i ja zrabiŭ niasłušnuju vysnovu, što źniščanyja i archivy. Ja ŭžo źviazaŭsia z dyrektaram dyrekcyi fondavych prahram «Biełteleradyjokampanii» Ałaj Viarenič, jana zapeŭniła, što i «Kałychanka», i «Zaprašajem na viačorki», i inšyja kultavyja prahramy svajho času nie źniščanyja. Nie ŭsie jany aličbavanyja, mahčyma, nie ŭsie vypuski zachavalisia, ale dakładna metanakiravana ničoha nie źniščałasia. Tamu kali kaho pakryŭdzili niedakładnaściu, to vybačajemsia i papraŭlajemsia.
Što tyčycca źniščeńnia lehiendarnych lalek z «Kałychanki» (Cimoški, Buślika, vaŭka Vovy), to heta infarmacyja dakładnaja i maje paćvierdžańni ad pieršakrynic, jakija zajavili pra heta ŭ našym efiry. Ich napatkaŭ taki ž los, jak i Dzieda-Baradzieda, jakoha rabotniki BT vykinuli na śmietnicu i nichto bolš jaho nie bačyŭ», — skazaŭ nam Vałošyn.
