SBU abvinavaciła KDB u sprobie viarboŭki ŭkrainca
Pravaachoŭnyja orhany Biełarusi zatrymali žychara Čarnihaŭskaj vobłaści padčas naviedvańnia svajakoŭ, abvinavacili jaho ŭ nielehalnym handli, a zatym zapatrabavali pieradavać infarmacyju ab pryhraničnych vajennych abjektach. Pra heta zajavili ŭ Słužbie biaśpieki Ukrainy.
«Žychar adnaho z pamiežnych nasielenych punktaŭ Čarnihaŭskaj vobłaści pieryjadyčna vyjazdžaŭ u Biełaruś, kab naviedać svajakoŭ. Padčas čarhovaj pajezdki ŭkrainiec byŭ zatrymany pravaachoŭnymi orhanami hetaj krainy za nibyta parušeńnie praviłaŭ handlu. Pry hetym pradstaŭniki KDB Biełarusi, pahražajučy kryminalnym pieraśledam, patrabavali ad mužčyny pieradavać infarmacyju ab vajennych abjektach, raźmieščanych na prymiežnaj terytoryi. Atrymanyja źviestki nieabchodna było pradastaŭlać pradstaŭniku biełaruskaj śpiecsłužby padčas vyjezdaŭ u Biełaruś», — havorycca ŭ zajavie viedamstva.
U viedamstvie raspaviali, što viarnuŭšysia na radzimu, ukrainiec adrazu źviarnuŭsia ŭ SBU i daŭ pakazańni pra abstaviny jaho viarboŭki i pastaŭlenych pierad im zadač.
Dziaržaŭnaja zdrada va Ukrainie karajecca terminam da 15 hadoŭ pazbaŭleńnia voli, uličvajučy toj fakt, što ŭkrainiec nie vykanaŭ zadaču zamiežnych śpiecsłužbaŭ i dobraachvotna zajaviŭ pravaachoŭnikam ab svajoj suviazi ź imi, sud vyzvaliŭ jaho ad kryminalnaj adkaznaści.
