Rasijskija kanały vydali kadry ź filma 2016 hoda ŭ jakaści dokazu insceniroŭki chimičnaj ataki ŭ Dumie
U vypuskach navin na «Pieršym kanale» i «Rasii 1» u jakaści dokazaŭ taho, što chimičnaja ataka ŭ siryjskaj Dumie była insceniravana, vykarystoŭvali kadry z mastackaha filma 2016 hoda, źniataha siryjskim režysioram Chumamam Chusary i pryśviečanaha chimičnaj atacy 2013 hoda, piša «Dožd́».
U vypusku navin na «Pieršym kanale» ad 22 krasavika viadučaja skazała, što «zachodnija palityki i presa ihnarujuć vidavočnyja dokazy taho, što nijakaj chimičnaj ataki ŭ siryjskim horadzie Duma nie było». «Napiaredadni źjavilisia śviedčańni vidavočcaŭ, jany taksama kažuć, što videakadry, źniatyja bajevikami ŭ špitali, byli insceniroŭkaj», — prakamientavała jana fatahrafii sa zdymak filma Chusary.
Tyja ž kadry byli pakazany ŭ prahramie «Viesti niedieli» ź Dźmitryjem Kisialovym ad 22 krasavika. «My jašče zdymali, jak dzieci ŭ kvartale byli raskidanyja: chto ŭ mašynach, chto pobač z mašynami, chto pad mašynami. Usie jany byli nibyta zahinuŭšymi. Ich tvary byli žoŭtymi», — kaža ŭ repartažy Fares Muchamad Majasa, pradstaŭleny jak udzielnik zdymačnaj hrupy.
Pakazanyja ŭ prahramach kadry apublikavała vydańnie Global Times u 2016 hodzie. Na ich adlustravanyja zdymki mastackaha filma, pryśviečanaha chimičnaj atacy 2013 hoda ŭ siryjskaj Hucie. Jany prachodzili ŭ vieraśni 2016 hoda.
Fota: skrynšot efiru «Pieršaha kanała».
Zdymki filma Chumamam Chusary. 2016 hod. Fota: Global Times.
Fota: Global Times.
Pra ŭžyvańnie chimičnaj zbroi ŭ Dumie 7 krasavika pieršymi paviedamili siryjskija pravaabaroncy. Pavodle ich infarmacyi, u vyniku zahinuli niekalki dziesiatkaŭ čałaviek.
