Śledčy kamitet prakamientavaŭ zatrymańnie žurnalista Źmitra Hałko
Ad 22 krasavika ŭ Stolinskim izalatary časovaha ŭtrymańnia znachodzicca žurnalist Źmicier Hałko, jaki viartaŭsia ŭ Biełaruś z Ukrainy. Va ŭpraŭleńni Śledčaha kamiteta pa Minsku prakamientavali dla «NN» hetuju spravu.
«Savieckim rajonnym adździełam Śledčaha kamiteta pačata kryminalnaja sprava pa abvinavačvańni 38-hadovaha mužčyny ŭ ździajśnieńni złačynstva, praduhledžanaha art. 364 KK (Hvałt u dačynieńni da supracoŭnika orhanaŭ unutranych spraŭ).
Hety hramadzianin znachodziŭsia ŭ vyšuku i, pa infarmacyi MUS, byŭ zatrymany. Paśla dastaŭleńnia zatrymanaha va ŭstanoŭlenym paradku dla praviadzieńnia śledčych dziejańniaŭ dadatkova budzie paviedamlena pra pracesualnyja rašeńni pa spravie», — havorycca zajavie.
Heta značyć, što pakul nie vyznačana, u jakim statusie budzie znachodzicca Hałko: padazravanaha ci abvinavačanaha. Nieviadomaja na hety momant i miera strymańnia.
Historyja pačałasia letaś u kancy listapada, kali Jan Hałko, niepaŭnaletni syn Źmitra, adznačaŭ svoj dzień naradžeńnia. Na śviatkavańni prysutničaŭ i baćka. Pavodle viersii milicyi, u kvatery była hučnaja muzyka, tamu niechta vyklikaŭ učastkovaha. Kali ŭčastkovy źjaviŭsia, to ŭ jaho nibyta adbyłasia sutyčka sa Źmitrom, u vyniku jakoj u milicyjanta byŭ pabity mabilnik.
Varta adznačyć, što na śviacie ŭ niepaŭnaletnich byŭ ałkahol. A potym udzielnikaŭ zatrymlivali amapaŭcy. Adzin z padletkaŭ uciakaŭ, skočyŭ z bałkona, pałamaŭ nahu.
Sam Hałko kazaŭ, što prosta ŭziaŭ milicyjanta za ruki, nijakaj bojki nie było.
Praź niejki čas paśla taho incydenta Hałko z synam źjechaŭ va Ukrainu, u Maryupal, dzie žyvie jahonaja ciapierašniaja žonka. Syn užo viarnuŭsia na radzimu, ciapier sprabavaŭ i baćka.
Źmicier Hałko — biełaruski žurnalist i błohier, jaki supracoŭničaŭ z mnohimi vydańniami. Zapomniŭsia sieryjaj repartažaŭ pra vajnu va Ukrainie.
