Na ŭkrainska-biełaruskaj miažy zatrymany žurnalist Źmicier Hałko, jamu pahražaje da šaści hadoŭ niavoli
Unačy supracoŭnikami pravaachoŭnym orhanaŭ byŭ zatrymany viadomy biełaruski žurnalist Źmicier Hałko. Pra heta ŭ fejsbuku paviedamiła jahonaja žonka Julija Harkuša.
«Źmicier usio ž pajechaŭ u Minsk, razrulić situacyju z padatkovaj, ale da Minska nie dajechaŭ, jaho aryštavali», — napisała jana.
Viadoma, što Hałko jechaŭ u Biełaruś sa Lvova. Jaho zatrymali ŭ Stolinskim rajonie.
Dziažurny Stolinskaha RAUS paviedamiŭ «Našaj Nivie», što Źmicier Hałko znachodzicca ŭ ich, jon byŭ abvieščany ŭ vyšuk jak padazravany pa artykule 364 KK «Hvałt abo pahroza prymianieńnia hvałtu ŭ adnosinach supracoŭnika orhanaŭ unutranych spravaŭ». Pavodle hetaha artykuła, žurnalistu moža pahražać da 6 hadoŭ źniavoleńnia.
Historyja pačałasia letaś u kancy listapada. Kali niepaŭnaletni syn Źmitra Jan adznačaŭ svoj dzień naradžeńnia, dzie prysutničaŭ i baćka. Pavodle viersii milicyi, u kvatery była hučnaja muzyka, tamu niechta vyklikaŭ učastkovaha. Kali ŭčastkovy źjaviŭsia, to ŭ jaho nibyta adbyłasia sutyčka sa Źmitrom, u vyniku jakoj u milicyjanta byŭ pabity mabilnik.
Varta adznačyć, što na śviacie ŭ niepaŭnaletnich byŭ ałkahol. A potym udzielnikaŭ zatrymlivali amapaŭcy. Adzin z padletkaŭ uciakaŭ, skočyŭ z bałkona, pałamaŭ nahu.
Sam Hałko kazaŭ, što prosta ŭziaŭ milicyjanta za ruki, nijakaj bojki nie było.
Praź niejki čas paśla taho incydenta Hałko z synam źjechaŭ va Ukrainu, u Maryupal, dzie žyvie jahonaja žonka. Syn užo viarnuŭsia na radzimu, ciapier sprabavaŭ i baćka.
Źmicier Hałko — biełaruski žurnalist i błohier, jaki supracoŭničaŭ z mnohimi vydańniami. Zapomniŭsia sieryjaj repartažaŭ pra vajnu va Ukrainie.