U Litvie palicejskija abvinavačvajuć biełarusa ŭ «pjanym» DTZ i supracivie, a jon ich — u źbićci
Adpačynak hramadzianina Biełarusi ŭ Druskininkai skončyŭsia niepryjemnaściami. Pa słovach mužčyny, jaho źbiła palicyja, adnak jaho apovied nie supadaje sa śviedčańniami palicyi. Hramadzianin Biełarusi skazaŭ partału Delfi, što palicyja źbiła jaho i abraziła za toje, što jon — zamiežnik. Incydent adbyŭsia 18 krasavika, ŭviečary.
Jon skazaŭ, što žyvie ŭ Litvie 6 hadoŭ, žanaty na hramadziancy Litvy, pracuje jurystam. Jon pajechaŭ adpačyć u Druskininkaj i spyniŭsia ŭ haścinicy Grand Spa Lietuva.
Pavodle jaho słoŭ, na stajancy jon nieaściarožna pryparkavaŭsia i ŭrezaŭsia ŭ dreva, ale nie nanios jamu nijakaj škody, tamu pakinuŭ aŭtamabil i pajšoŭ. Kali jon viartaŭsia ŭ haścinicu, zaŭvažyŭ, što kala jaho aŭtamabila stajać 6 palicyejskich, jakich vyklikała administratar haścinicy. Pa słovach biełarusa, jaho paprasili pradjavić dakumienty. Jon adkazaŭ, što jany ŭ haścinicy, i pajšoŭ za imi, a ŭ hety momant palicejskija napali na jaho i pačali źbivać. Paśla hetaha palicejskija pavieźli mužčynu ŭ kamisaryjat. Tam jamu stała drenna, i jaho pavieźli ŭ balnicu.
Mužčyna skazaŭ, što ŭ balnicy ŭ jaho zafiksavali ŭdar pravaj nyrki i kalena levaj nahi, adnak paśla ahladu ź lakarni jaho znoŭ pryvieźli ŭ kamisaryjat. Mužčyna pryznaŭ, što admoviŭsia praviaracca na ćviarozaść, i admoviŭsia padpisać pratakoł, pavodle jakoha jon, znachodziačysia ŭ niećviarozym stanie, ździejśniŭ DTZ. Mužčyna taksama skazaŭ, što na jaho słovy ab padačy skarhi jamu adkazali — «ty zamiežnik, tabie nichto nie pavieryć».
Delfi źviazaŭsia z pres-sakratarom palicyi Alituskaj akruhi Kryścinaj Janulavičene, jakaja pradstaviła inšuju viersiju incydentu. Pavodle jaje słoŭ, u sieradu pozna viečaram u palicyju paviedamili, što niećviarozy kiroŭca aŭtamabila Mazda urezaŭsia ŭ dreva i syšoŭ ź miesca zdareńnia. Palicyja vyjechała na miesca. Pa słovach Janulavičene, vyjechaŭ adzin ekipaž, u jakim było dvoje palicejskich.
Janulavičene taksama skazała, što mužčyna pavodziŭ siabie ahresiŭna, abražaŭ palicejskich, nie vykonvaŭ ich patrabavańni, tamu na jaho nadzieli kajdanki. Pavodle jaje słoŭ, lekary dyjahnastavali ŭ mužčyny drapiny na dałoni, pra inšyja paškodžańni nie paviedamlałasia. Lekary infarmavali palicyju, što miedycynskaja dapamoha jamu niepatrebnaja. Lekary i palicyjanty pierakananyja, što mužčyna byŭ pjany, jon kazaŭ biazładna, pavodziŭ siabie nieadekvatna, ad jaho pachła pieraharam.
Zaraz palicyja čakaje zapisy ź videakamier Grand Spa Lietuva, kab vyśvietlić, na čyim baku praŭda. Janulavičene skazała, što mužčynu abvinavačvajuć u akazańni supracivu palicyi, abrazie ich honaru i hodnaści i ździajśnieńni DTZ u stanie ałkaholnaha apjanieńnia.
