«Rejdy suprać biełarusaŭ»: pačali źjaŭlacca pastanovačnyja VIDEA ab napadach na biełarusaŭ u Čarnihavie
Prarasijskija siły praciahvajuć stvarać infarmacyjnyja nahody, zdolnyja supraćpastavić ukraincaŭ biełarusam.
U pačatku miesiaca heta byli radykalnyja antybiełaruskija nadpisy na šapikach u Čarnihavie, pra jakija choram i ŭ detalach spravazdačylisia čarnasocienskija resursy.
U Čarnihavie źjavilisia antybiełaruskija nadpisy. Kopija pravakacyj u Zakarpaćci?
Vidavočna, što tady svaich metaŭ pravakacyja nie dasiahnuła, i zacikaŭlenyja asoby pačali hulacca z farmatami: na hety raz jany źniali pastanovačnyja videa «rejdaŭ na biełarusaŭ».
«Sustreŭ biełarusa — «pryvitaj» i adpraŭ jaho da baćki», — z hrubymi hramatyčnymi pamyłkami pišuć aŭtary ŭ naźvie videa. Usiaho źjaviłasia dva roliki.
Na pieršym videa ŭ kadr trapiła mašyna na biełaruskich numarach z zakrytymi dźviaryma, kala jaje — čałaviek. Ničoha nie ŭkazvaje na toje, što jon vyjšaŭ z hetaj mašyny ci jana jamu naležyć. Tut ža na jaho napadajuć, jon nie akazvaje supraciŭleńnia i padaje, dva čałavieki praciahvajuć nanosić udary: pry zapavolenym prahladzie vidać, što «ŭdary» nanosiacca rastapyranymi palcami, a nie kułakom — heta pastanoŭka.
Druhoje videa bolš padobnaje na praŭdu: dvoje ŭ kadry prosiać čałavieka, jaki siadzić u mašynie ź biełaruskimi numarami, adkryć akno, pyrskajuć jamu ŭ tvar piarcovym bałončykam i sychodziać sa słovami «nie pryjazdžaj siudy bolš».
Aŭtary iduć nasupierak ukrainskaj tradycyi zmahacca suprać čaho b ni było z adkrytym zabrałam i nie pakazvajuć svaje tvary. Ale videa vykładzienaje z akaŭntu arhanizacyi «Čarnihaŭski tryzub» — zhadak u internecie pra taki ruch niama. Ale dopisy ŭ śviežastvoranych sacyjalnych sietkach pavinny stvaryć uražańnie, što za hetymi «napadami» staić niejkaja radykalnaja ŭkrainskaja arhanizacyja.
Cikava, što mienavita ŭ Čarnihavie dva dni tamu SBU vykryła sietku prarasijskich ahientaŭ, jakija zajmalisia raspalvańniem mižnacyjanalnaj varožaści — razmaloŭvali ścieny damoŭ i sinahoh antysiemickimi dy antypolskimi nadpisami pavodle zadač kurataraŭ z Rasii.
Chto viedaje, moža, siarod zatrymanych jość i ludzi na «biełaruskich» videa?
Taksama ŭkrainskim siłavikam udałosia złavić u Lvovie złačynnuju hrupu, jakaja ŭzarvała na polskich mohiłkach hranatu — heta taksama byli ludzi, jakija dziejničali ŭ intaresach trecich krain i finansavalisia «sa struktur, blizkich da rasijskich śpiecsłužbaŭ», paviedamlaje SBU.
Admietna, što pieršym hetyja videa biełaruskaj tematyki apublikavaŭ u siabie na staroncy ŭ fejsbuku palitołah Piatro Piatroŭski, jaki ŭžo byŭ zaŭvažany raniej u rabocie pavodle techničnych zadańniaŭ z trecich krain.
Čytajcie: Chakiery apublikavali dakumienty, zhodna ź jakimi biełaruskija aŭtary rychtujuć svaje publikacyi pa zakazach maskoŭskich palittechnołahaŭ
* * *
Udakładnieńnie: u pieršasnaj viersii artykuła zhadvałasia, što historyju ŭ Čarnihavie aktyŭna aśviatlaŭ «Sputnik». U realnaści na sajcie «Sputnika» takoj infarmacyi nie było
