Cimčanka, Kuźniacoŭ, Dyńko: «Reśpiekt Duravu!»
Znakavyja postaci miedyja-biznesu vykazali padtrymku Paŭłu Duravu, jaki abviaściŭ Rasii «ličbavy supraciŭ».
«Zrazumieła, što Paŭłu Duravu moj reśpiekt patrebny prykładna jak śnieh zimoj. Ale jaki ž małajčyna. Usio pravilna robić», — piša zasnavalnica papularnaha rasijskaha partała «Mieduza» Halina Cimčanka.
«Duraŭ nanios pa Rasii ŭdar macniejšy, čym sajuźniki ŭ Siryi. Kraina, jakaja zajaŭlaje ab svaich zvyšambicyjach, akazałasia dziaržavaj, jakoj nie ŭdajecca zabiaśpiečyć vykanańnie svaich sudovych rašeńniaŭ», — piša vydaviec z Homiela Piatro Kuźniacoŭ.
«Dziakuj Duravu za vyklik, jaki jon kinuŭ Rasii. Prava na tajamnicu pierapiski ŭpisvajuć va ŭsie kanstytucyi, ale nachabna parušajuć. Padtrymlivaju ličbavy supraciŭ», — napisaŭ u siabie ŭ fejsbuku redaktar «Našaj Nivy» Andrej Dyńko.
Nahadajem, što ŭłady Rasii pryniali rašeńnie ab błakavańni mesendžara Telehram, jaki admoviŭsia dać śpiecsłužbam nieabmiežavany dostup da kamunikacyi svaich karystalnikaŭ. Karystalniki Telehram abychodziać błakavańnie ŭ Rasii, vykarystoŭvajučy vpn. Tady rasijskija ŭłady pačali błakavać resursy z proxy i vpn. Na heta zasnavalnik Telehrama Pavieł Duraŭ adkazaŭ hatoŭnaściu vypłačvać miljonnyja hranty administrataram proxy i vpn.