Dzieci z parušeńniami zroku ź Minska i Maładziečna atrymali biełaruskija aŭdyjoknihi
Padčas dabračynnaj akcyi «Dorym radaść!» u Maładziečnie vučniam adnoj sa škoł-internataŭ raspaviali pra biełaruskuju historyju i padaryli nabory ź biełaruskamoŭnych aŭdyjoknih.
Inicyjatyva akcyi naležyć sacyjalna-kulturnaj dabračynnaj ustanovie «MocArt», jakaja zajmajecca inkluzijaj i reabilitacyjaj dziaciej ź invalidnaściu i sumiaščaje heta z prasoŭvańniem nacyjanalnaj kultury. Da idei dałučylisia i partniory, siarod ich — kampanija Prastora.by, jakaja, aproč inšaha, zapisvaje biełaruskija aŭdyjoknihi. Dziakujučy joj kožny vučań atrymaŭ u padarunak nabor ź piaci adpaviednych uzrostu aŭdyjoknih pa-biełarusku z kazkami, pieśniami i tvorami biełaruskich aŭtaraŭ.
— Vyjaviłasia, što va ŭsich śpiecyjalizavanych ustanovach dla dziaciej z parušeńniami zroku ŭ krainie jość aŭdyjoknihi na ruskaj movie, a na biełaruskaj — niama, — raspavioŭ kiraŭnik kampanii Prastora.by Alaksandr Kvitkievič.
Tamu biełaruskija biźniesoŭcy sabrali hrošy na aŭdyjoknihi, a taksama na inšyja padarunki: cukierki, ziołkavuju harbatu dla padvyšeńnia imunitetu, paštoŭki, ilnianyja torbački ź biełaruskim arnamientam.
Aproč padarunkaŭ hadavancaŭ Maładziečanskaj śpiecyjalnaj ahulnaadukacyjnaj škoły-internata №2 dla dziaciej z parušeńniami zroku zabaŭlali admysłova padrychtavanym šou. Pierad imi vystupiŭ viadomy muzyka Jaŭhien Baryšnikaŭ, jaki raspavioŭ pra biełaruskuju dudu i prademanstravaŭ, jak jana hraje. Rekanstruktary rycarskich bajoŭ pryvieźli ŭ škołu vajarskija daśpiechi i zbroju, raspaviali, jak vajavali našy prodki ŭ daŭnija časy, a taksama pakazali niekalki šlachieckich dvubojaŭ, čym pryviali dziatvu ŭ niejmaviernaje zachapleńnie. Da taho ž paśla vystupaŭ usie vajarskija artefaty možna było pamacać, prymieryć i sfatahrafavacca ź imi.
Akcyja «Dorym radaść!» u Maładziečnie stała ŭžo druhoj pa liku. Pieršaja prachodziła ŭ Minsku ŭ škole №188 dla dziaciej z parušeńniami zroku, dzie padarunki atrymali 110 vychavancaŭ. Arhanizatary akcyi spadziajucca zavitać va ŭsie padobnyja ŭstanovy krainy, kab padaryć dzieciam radaść i paznajomić ź biełaruskaj historyjaj i kulturaj.
