Stała viadoma, u jakija krainy biełarusy adpraŭlajucca ŭ pošukach pracy
Biełarusy stali čaściej adpraŭlacca na zarobki za miažu. Tak, u pieršym kvartale hetaha hoda ŭ pošukach pracy za miažu źjechała 2187 čałaviek, a za anałahičny pieryjad minułaha hoda — na 348 čałaviek mienš.
U jakich krainach šukajuć pracu biełarusy
Bolš aktyŭna za ŭsio ŭ studzieni-sakaviku hetaha hoda na zarobki vyjazdžali minčuki — 697 čałaviek (hodam raniej — 426). A voś žychary Minskaj vobłaści amal pierastali adpraŭlacca za rublom u inšyja krainy — 12 čałaviek u pieršym kvartale (hod tamu — 62).
U Rasii ŭ studzieni-sakaviku znajšli pracu 1030 biełarusaŭ, u Polščy — 686 čałaviek, u Litvie — 308, u ZŠA — 46, u Čechii — 45, u Kitai — 19, a ŭ Katary — 13.
Bolšaść biełarusaŭ — 1284 čałavieka ŭ studzieni-sakaviku — vyjazdžała na zarobki pa pracoŭnych damovach da paŭhoda, pieravažna u Polšču (670) i Rasiju (568). A voś u Litvu zvyčajna jeduć pa damovach terminam bolš za hod (266 čałaviek u pieršym kvartale).
Biełaruskija rabočyja zapatrabavany pieravažna u Rasii (1003), Polščy (672), Litvie (308) i Čechii (45). U ZŠA i Turcyi našy suajčyńniki ŭładkoŭvajucca čaściej za ŭsio ŭ arhanizacyi handlu i śfiery absłuhoŭvańnia — 41 i 19 čałaviek adpaviedna. A voś na kirujučuju pazicyju za miažoj u studzieni-sakaviku ŭziali tolki adnaho biełarusa — u Polščy.
Našy suajčyńniki lehalna pracaŭładkoŭvalisia ŭ pieršym kvartale ŭ 18 krainach, u tym liku ŭ Turcyi, Japonii, Hankonhu, Italii, Karei, Finlandyi.
Pry hetym mužčyny čaściej za žančyn adpraŭlajucca na zarobki ŭ inšyja krainy — 1690 suprać 497 u pieršym kvartale.
