Rasijancy zabaranili naviedvać hurtok pa animacyi z-za jaje połu
Žycharka Maskvy Hanna Chiehaj nie zmahła zapisać svaju dačku na kurs kampjutarnaj animacyi ŭ Pałacy tvorčaści dziaciej i moładzi na Miŭsach, tamu što taki hurtok padrychtavali tolki dla chłopčykaŭ. Dziaŭčyncy prapanavali hurtok rukadziella, a jaje maci — «skardzicca choć u ABSIE», paviedamlaje «Miediazona».
Maskvička źviarnułasia ŭ Pałac padčas viasnovych kanikuł, kab znajści hurtok dla svajoj dziesiacihadovaj dački. Joj prapanavali tolki rukadzielle, kačańnie z voŭny i lepku. Na pytańnie ab tym, čamu dziaŭčynki nie mohuć zajmacca kampjutarnaj animacyjaj, Chiehaj zajavili, što hetym zajmajucca tolki chłopčyki i kali jana niezadavolenaja, moža znajści inšaje miesca.
U kamientarach da jaje zapisu ŭ Facebook dyrektar ustanovy Volha Karavackaja raspaviała pra toje, što padzieł pa prykmiecie połu vyrašyli zrabić pa prośbie niejkich baćkoŭ.
Na pytańnie ab tym, čamu dziŭnyja pažadańni byli vykanany ŭ parušeńnie rasijskaha zakona ab adukacyi, zhodna ź jakim nielha admaŭlać vučniam u atrymańni viedaŭ pa prykmiecie połu, Karavackaja nie adkazała.
Pa dadzienych sajta Pałaca tvorčaści dziaciej i moładzi na Miŭsach, padčas viasnovych kanikuł tam sapraŭdy pracujuć asobnyja hrupy. Chłopčyki mohuć naviedvać zaniatki pa «Leha-animacyi» i Wargame, dziaŭčynki — tancy i rukadzielle. Dzieciam abodvuch pałoŭ (7-9 hadoŭ) možna chadzić tolki na fizkulturu i zaniatki pa Lego.
