Kniha pra lićvinaŭ u hvardyi Napaleona atrymała premiju Bahuševiča
U dzień naradžeńnia Franciška Bahuševiča, 21 sakavika, biełaruski PEN-centr u 23 raz uručyŭ premiju imia Bahuševiča.
Premija zasnavanaja ŭ 1994 hodzie i tradycyjna ŭručajecca za vydatnuju histaryčnuju prozu aŭtaram knih, što spryjajuć abudžeńniu histaryčnaj śviadomaści i nacyjanalnaj niezaležnaści čytačoŭ.
Pieramožcam sioleta staŭ Uładzimir Lakin z knihaj «Lićviny ŭ hvardyi Napaleona». Lakina na imprezie nie było. Atrymała ŭznaharodu redaktar vydańnia Dzijana Sielach.
— Ja vielmi radaja, što našu knihu zaŭvažyli, što jana pryjšłasia daspadoby. Heta nie vielmi ścipła, ale kniha nasamreč dobraja, — ścipła prakamientavała Sielach.
Bolš havarlivym byŭ vydaviec knihi, hałoŭny redaktar vydaviectva «Technałohija» Źmicier Sańko.
— Adčuvaju vialikaje zadavalnieńnie, što hetaja kniha, jakaja stała jaskravaj źjavaj u kulturnym žyćci našaj krainy, uhanaravana hetaj premijaj, — raspavioŭ «Narodnaj Voli» Sańko. — Prodki aŭtara byli ŭ hvardyi Napaleona, zmahalisia ŭ elitnych farmavańniach. I ŭ fundatara knihi Uładzimira Bržezskaha, jaki źjaŭlajecca školnym siabram aŭtara, pradziedy zmahalisia ŭ armii Napaleona. Heta tema słaba daśledavana ŭ našaj historyi.
Vydaviec pryhadaŭ adnu z historyj, apisanych u knizie.
— Adzin z naščadkaŭ hvardziejca Višnieŭskaha ŭ tryccatyja hady rehistravaŭ svajho syna ŭ ZAHSie. Jon pažadaŭ, kab syna zapisali Napaleonam. Zrazumieła, sielsavietčyk skazaŭ, što nie, heta vorah. Tady było prapanavana zapisać syna Banapartam. «Što heta za imia?», — spytaŭ sielsavietčyk. «Miascovaje, typu Dermidonta». Ironija losu ŭ tym, što kałhas nasiŭ imia Kutuzava. Heta śviedčyć pra toje, što pamiać zachoŭvałasia.
***
Letaś Premiju Bahuševiča atrymali Viktar Korbut i Dźmitryj Łaśko za knihu «Minsk. Spadčyna staroha horada. 1067—1917».