Cukierbierh praz skandał straciŭ 5 miljardaŭ dalaraŭ za sutki
Vykanaŭčy dyrektar i zasnavalnik Facebook Mark Cukierbierh straciŭ 4,9 miljarda dalaraŭ na padzieńni akcyj kampanii ŭ paniadziełak, 19 sakavika, paviedamlaje Bloomberg.
Akcyi Facebook upali na siem adsotkaŭ paśla źjaŭleńnia infarmacyi ab tym, što brytanskaja analityčnaja kampanija Cambridge Analytica zmahła sabrać pryvatnyja dadzienyja bolš za 50 miljonaŭ karystalnikaŭ sacyjalnaj sietki bieź ich viedama i na asnovie hetaha stvaryć ałharytm analizu palityčnych pieravah amierykancaŭ.
Bahaćcie Cukierbierha skaraciłasia da 70,4 miljarda dalaraŭ. Pavodle rejtynhu najbahaciejšych ludziej płaniety pa viersii Bloomberg, paśla padzieńnia akcyj Facebook jon straciŭ adnu pazicyju ŭ rejtynhu miljarderaŭ, apuściŭšysia na piataje miesca.
Pa dadzienych The New York Times, Cambridge Analytica raspracavała mabilny dadatak, jaki źbiraŭ asabistyja dadzienyja karystalnikaŭ Facebook. Pa śćviardžeńni haziety, infarmacyja ŭ dalejšym była vykarystanaja dla składańnia psichałahičnych partretaŭ patencyjnych vybarščykaŭ i dazvalała stvarać rekłamu dla pieradvybarčaj kampanii ciapierašniaha prezidenta ZŠA Donalda Trampa. U Facebook zajavili, što nie viedali pra heta — 16 sakavika kampanija zabłakavała dostup Cambridge Analytica da svaich siervieraŭ.
