Stała viadoma apošniaje adkryćcio Styviena Chokinha, za jakoje jon moh by atrymać Nobieleŭskuju premiju
Apošni artykuł brytanskaha fizika Styviena Chokinha, jaki pamior 14 sakavika 2018 hoda, pryśviečany paralelnym suśvietam i tamu, jak čałaviectva moža znajści ślady ich isnavańnia, paviedamlaje hazieta Telegraph.
«U svaim apošnim artykule Chokinh vykazaŭ vielmi cikavuju dumku pra toje, što multysuśviet musiŭ pakinuć asablivy adbitak na tak zvanym fonavym mikrachvalevym vypramieńvańni Suśvietu (recha Vialikaha vybuchu), jaki možna ŭbačyć, vykarystoŭvajučy detektary na borcie kaśmičnych zondaŭ. Hetaja ideja daje ŭzrušajučuju pierśpiektyvu adkryćcia pieršych śladoŭ isnavańnia inšych śvietaŭ», — raspavioŭ Karłas Fienk, kasmołah z univiersiteta Darema.
Bolšaja častka navukoŭcaŭ ličyć, što Suśviet naradziŭsia ź sinhularnaści, jakaja pačała imkliva pašyracca ŭ pieršyja imhnieńni paśla Vialikaha vybuchu. Inšaja hrupa astrafizikaŭ miarkuje, što naradžeńniu našaha Suśvietu papiaredničała śmierć jaho papiarednika, jakaja, vierahodna, zdaryłasia padčas tak zvanaha Vialikaha razryvu.
Hałoŭnaja prablema hetych teoryj — niesumiaščalnaść z Teoryjaj adnosnaści. U momant, kali Suśviet ujaŭlaŭ saboj biespamiernuju kropku, jon pavinien byŭ vałodać biaskoncaj ščylnaściu enierhii i kryviznoj prastory, što niemahčyma z punktu hledžańnia teoryi Ejnštejna.
Dla vyrašeńnia hetaj prablemy navukoŭcy raspracavali niekalki alternatyŭnych teoryj, u jakich Suśviet naradžajecca ŭ inšych umovach. Naprykład, Styvien Chokinh i Džejms Chartł u 1983 hodzie vykazali zdahadku, što Suśviet byŭ kropkaj nie tolki ŭ prastory, ale i ŭ časie, i da jaho naradžeńnia času prosta nie isnavała. Heta pazbaŭlaje sensu pytańnie ab «pačatku» isnavańnia Suśvietu.
U apošniaj pracy Chokinh i jaho kaleha Tomas Ertah ź Levienskaha ŭniviersiteta (Bielhija) pabudavali tearetyčnuju madel multysuśvietu, jaki viečna pašyrajecca, pradstaviŭšy jaho ŭ vyhladzie dvuchmiernaje hałahramy.
Ich cikaviła toje, nakolki raznastajnymi buduć inšyja śviety i toje, ci buduć jany ŭpłyvać na pavodziny toj častki, u jakoj my žyviom.
Raźliki niečakana pakazali, što novyja suśviety buduć mienš raznastajnymi, čym ich pryvykli ličyć kasmałohii, i pakazali na najaŭnaść ich mahčymych śladoŭ u mikrachvalevym fonavym vypramieńvańni Suśvietu, jakoje ŭźnikła ŭ pieršyja siekundy paśla Vialikaha vybuchu.
Jak ličyć Ertah, artykuł stanie praryŭnym adkryćciom Chokinha, kali hetyja pradkazańni paćvierdziacca ŭ budučyni. Jon upeŭnieny, što vialiki brytanski fizik atrymaŭ by Nobieleŭskuju premiju, kali b nie pamior na 76-m hodzie žyćcia.