Na śviatkavańnie 100 hod BNR u Hrodnie sabrali pałovu ad patrebnaj sumy
Arhkamitet sabraŭ kala pałovy ad 8270 rubloŭ, jakija patrebnyja na arhanizacyju śviata. Na mierapryjemstvie vystupiać šeść hurtoŭ z Hrodna i nie tolki, paviedamlaje Hrodna.life.
— Techničnaja častka zbolšaha zavieršanaja, jość scena i aparatura. Pytańnie z padklučeńniem elektryčnaści vyrašanaje, — raskazvaje Vadzim Sarančukoŭ z arhkamitetu. — Viečaram budzie viadomy śpis muzykantaŭ. Kancerty dazvolenyja pa ŭsioj Biełarusi, tamu zaraz adbyvajecca takoje spabornictva pa pieraciahvańni hurtoŭ. Ale śviata ŭ lubym vypadku atrymajecca viasiołym, klovym, adpaviednym stohadovamu jubileju.
Pieramožcy «Basovišča» i tajamničy chedłajnier
Zbor hrošaj idzie praz Tałaku, aktyvistaŭ i kramu «Cudoŭnia». Vadzim ličyć, što patrebnuju sumu jany źbiaruć paśla taho, jak budzie sfarmavana afiša. A jana źjavicca, kali ŭsie hurty daduć zhodu na ŭdzieł i prahavorać techničnyja momanty.
Zapłanavany ŭdzieł šaści kalektyvaŭ z Hrodna i nie tolki. Siarod ich: Tlusta Lusta, pieramožcy Basovišča-2008 i hurt «Harotnica» z Andrusiom Takidanham. Zaraz arhanizatary čakajuć adkazu chedłajniera, imia jakoha nie raskryvajuć.
Što akramia muzyki
Taksama zapłanavana fotazona, fudkort, akvahrym, čekanka maniet, animatary, prodaž histaryčnych knih, kirmaš nacyjanalnaaryjentavanaj simvoliki i atrybutyki, zabaŭlalnyja mierapryjemstvy dla dziaciej i darosłych. Pamiž vystupami muzykaŭ sa stahodździem BNR pavinšujuć Aleś Suraŭ, Dzianis Žyhaviec, historyki i paety. Pierad śviatam u 12.00 u Kałožskaj carkvie adbudziecca malitva za Biełaruś.
— My raźličvajem na internet i rekłamu ŭ sacsietkach. Abjem zvankoŭ pakazvaje, što infarmacyja pra śviata raspaŭsiudžvajecca davoli aktyŭna. Kali budzie zaćvierdžany kančatkovy śpis hurtoŭ - źjaviacca afišy, jakija my raźmieścim na haradskich tumbach, — kaža Vadzim Sarančukoŭ.
Achviaravać na praviadzieńnie śviata možna ŭ kramie «Cudoŭnia» (https://vk.com/cudounia, https://www.facebook.com/Cudounia), albo pazvaniŭšy na numary +375 296 540 534 (Vadzim), ci +375 295 852 585 (Dźmitryj). A taksama na «Tałace».