U Polščy vyjšaŭ z turmy čałaviek, jaki adsiadzieŭ 18 hadoŭ za zabojstva, što nie ździajśniaŭ
Praz pamyłku polskaj justycyi Tomaš Kamienda ŭ 2000-m hodzie byŭ asudžany na 25 hadoŭ za zabojstva, jakoha jon nie ździajśniaŭ. U čaćvier pa rašeńni haradskoha suda Urocłava mužčyna byŭ vyzvaleny i vyjšaŭ na volu, paviedamlaje TASS.
Tomaš Kamienda. Fota wiadomosci.gazeta.pl.
Tomaš Kamienda byŭ abvinavačany polskim sudom u zhvałtavańni i zabojstvie 15-hadovaj dziaŭčyny, ździejśnienym u 1997 hodzie paśla dyskateki ŭ vioscy Miłošycy. Adzinym dokazam suprać mužčyny staŭ jaho vołas, znojdzieny na šapcy zabitaj. Pry hetym 11 śviedak pad prysiahaj paćvierdzili sudździam, što ŭ dzień zabojstva Kamienda znachodziŭsia ŭ inšym miescy.
Sam abvinavačvany ŭsio admaŭlaŭ, a potym daŭ pakazańni, što na dyskatecy jon usio ž byŭ. Na sudzie Kamienda admoviŭsia ad svaich papiarednich pakazańniaŭ, zajaviŭšy, što jany byli vybityja ź jaho ŭ palicyi pad katavańniami.
Niahledziačy na ŭsie hetyja abstaviny, sud prysudziŭ jaho da 25 hadoŭ turemnaha źniavoleńnia.
Tomasz Komenda jest już na wolności. @RMF24plpic.twitter.com/WnX8uCdXSj
«Ja dumaŭ, što nie vyjdu z turmy žyvym, tamu što mianie źbivali sukamierniki, upeŭnienyja ŭ tym, što ja zabiŭ niepaŭnaletniuju», — raspavioŭ Kamienda žurnalistam. Jon pryznaŭsia, što sprabavaŭ zabić siabie, ale jaho vyratavali inšyja źniavolenyja.
Fakty, jakija paćviardžajuć niedatyčnaść Kamiendy da inkryminavanych jamu złačynstvaŭ, byli vyjaŭlenyja śpiecyjalna stvoranaj śledčaj hrupaj. U padrychtavanaj śledčymi spravazdačy śćviardžajecca, što častka dokazaŭ, praź jakija Kamiendu adpravili za kraty, była sfalsifikavanaja.
«Kali paćvierdzicca, što niavinny čałaviek pravioŭ u ścienach turmy 18 hadoŭ, to suprać tych, chto dapuściŭ takuju fatalnuju pamyłku, pavinna być raspačata śledztva», — prakamientavaŭ situacyju ministr justycyi Źbihnieŭ Ziobra.
Infarmacyi pra mahčymuju vypłatu Tomašu Kamiendu kampiensacyi za hady, praviedzienyja za kratami, pakul nie pastupała.