U Mačuliščach pjanaja haspadynia nackavała dvuch sabak na čałavieka, a paśla sprabavała i na milicyjantaŭ
Nočču 16 sakavika ŭ Mačuliščanski adździeł milicyi Minskaha RUUS pastupiŭ zvanok ad miascovaj žycharki: na jaje ziacia napali dva sabaki, jamu patrebnaja dapamoha.
Jak paźniej patłumačyŭ paciarpieły mužčyna, jon vyjšaŭ z doma ŭ načnuju źmienu i nakiroŭvaŭsia ŭ bok prypynku elektryčki. Pa darozie zaŭvažyŭ, što niepadalok žančyna vyhulvaje dvuch sabak, padobnych na koli i baksiora, ale asablivaha značeńnia hetamu nie nadaŭ, paviedamlaje UUS Minabłvykankama.
Niečakana da mužčyny padbiehli hetyja dva sabaki, nastrojenyja vidavočna ahresiŭna, paśla čaho žančyna kryknuła «fas». Kali adna z žyvioł ukusiła minaka, jon kinuŭsia biehčy. Sabaki stali jaho pieraśledavać, a žančyna jašče raz vyhuknuła kamandu napadu. Mužčyna zdoleŭ dastać mabilny telefon i nacisnuŭ na pieršy numar, što trapiŭsia. Kali ciešča źniała trubku, jon chutka abmalavaŭ situacyju i paprasiŭ patelefanavać u milicyju.
Supracoŭniki Mačuliščanskaha adździeła milicyi ŭbačyli sabak niepadalok ad miesca zdareńnia. Tyja, atrymaŭšy jašče adnu kamandu ad haspadyni, kinulisia ŭžo na ich. Milicyjanty pryniali rašeńnie vykarystać tabielnuju zbroju. Papieradžalny streł spyniŭ tolki baksiora, nastupnyja dva streły — i druhoha sabaku. Jon zastaŭsia žyvy, u vietklinicy ź jaho kancavin vyniali dźvie kuli.
Jak rastłumačyŭ namieśnik načalnika Mačuliščanskaha adździeła milicyi Andrej Bandarčuk, haspadynia sabak — 54-hadovaja miascovaja žycharka. Na momant zatrymańnia žančyna znachodziłasia ŭ mocnym ałkaholnym apjanieńni. U žniŭni minułaha hoda jana ŭžo pryciahvałasia da adkaznaści ŭ padobnaj situacyi. Tady jana atrymała štraf 460 rubloŭ.
Ciapier z nahody zdareńnia pravodzicca pravierka. Vierahodna, havorka budzie iści pra kryminalnuju adkaznaść za ździajśnieńnie złosnaha chulihanstva.
