Elektryk Nastaśsia z Hrodna: «Kali mianiała lampački na aporach, kalehi źbiralisia vakoł i hladzieli na mianie jak na ekspanat»
Pra Nastaśsiu Karpuk my daviedalisia paśla kastynhaŭ na sioletni konkurs «Mis Biełaruś», adzin ź jakich prachodziŭ u jaje rodnym Hrodnie. Siarod inšych kankursantak jaje vyłučała śfiera dziejnaści: dziaŭčyna źviazała žyćcio z elektryčnaściu. Čym byŭ abhruntavany taki vybar i jak Nastaśsiu ŭsprymajuć u prafiesii — pra heta my daviedalisia ad jaje samoj, kali jana pryjechała ŭ Minsk na siesiju.
Paśla skančeńnia technałahičnaha kaledža pa śpiecyjalnaści «mantaž i ekspłuatacyja elektraabstalavańnia» dziaŭčyna atrymlivaje vyšejšuju adukacyju ŭ svajoj śfiery ŭ BDATU.
Nastaśsia Karpuk.
Pra vybar prafiesii
Kali jašče vučyłasia ŭ škole, dumała, što stanu chareohrafam, ale ŭsie vakoł tłumačyli, što heta niesurjozna. Moj baćka — elektryk, starejšy brat — taksama.
Tata zaŭsiody vučyŭ nas raźbiracca ŭ tym, jak pracuje elektryčnaść. Pamiataju, na leciščy my z bratam samastojna rabili pravodku, a jon siadzieŭ i kantralavaŭ praces. Tamu kali pryjšoŭ čas abirać sabie śpiecyjalnaść, mnie prapanavali, možna skazać, pajści pa śladach starejšych u siamji.
Pra navučańnie siarod chłopcaŭ
Dla pastupleńnia ŭ kaledž ja zdavała matematyku i biełaruskuju movu.
Kali apublikavali śpis maich adnahrupnikaŭ, ja vielmi ŭzradavałasia, što razam sa mnoj budzie vučycca jašče adna dziaŭčyna. Ale potym vyśvietliłasia, što heta Alaksandr: u dekanacie niapravilna zapisali jaho imia.
Tak što ja była adzinaj dziaŭčynaj u hrupie: spačatku było dzika, ale chutka ja ŭliłasia ŭ kampaniju.
Pra ciažkaści
Składaniej za ŭsio mnie davałasia fizika. Ale pašancavała, što pobač byŭ baćka, jaki pry patrebie moh patłumačyć usie niuansy raboty lampački ci niejkich pryboraŭ. Na praktykach, źbirajučy schiemy, ja pastajanna raździrała sabie ruki, a kali mianie pa raźmierkavańni adpravili ŭ viosku, stała jašče viesialej.
Pra raźmierkavańnie maładoha elektryka
Na adpracoŭku mianie adpravili ŭ viosku Vialikija Aziarki ŭ SPK «Aziaranski». Heta ŭ Mastoŭskim rajonie, paŭtary hadziny ad Hrodna. Praŭda, transpart tudy chodzić niepastajanna i niama varyjantaŭ dabracca bieź pierasadki, tamu žyła ja na miescy.
U mianie i baćki, i babuli haradskija, tamu navat ubačyć śvinak i karoŭ žyŭcom było dla mianie mocnym uražańniem. Da haračaj vady, jakuju treba było kožny raz nahravać, kab pryniać duš, ja taksama pryvykała.
Mianie pastavili na pasadu majstra. Dzieści paŭhoda ja prosta zapaŭniała papierki i sačyła za tym, što robiać na fiermach kalehi. Paśla ja i sama aśmialeła, dy i mužčyny z kalektyvu davieryli rabić peŭnyja rečy: dzieści zamianić lampački, razabrać złamany starter, zamianić pravodku…
U vioscy było narmalna, kali nie ličyć staroje abstalavańnie i instrumienty. Ale tam nie było ni televizara, ni narmalnaha internetu. Nie było navat ravieśnikaŭ, ź jakimi možna było b kamunikavać. U miascovy kłub ja schadziła adzin raz i bolš nie zachacieła: tam adny školniki, jakija štotydzień apranajuć na siabie ŭsio samaje najlepšaje i bliskučaje.
Karaciej, praz hod mnie stała tam sumna. Tamu, uziaŭšy adpačynak, ja pačała šukać miesca, kudy b možna było pieraraźmierkavacca.
Pra samastojnaje pracaŭładkavańnie
Ja łaziła pa abjavach u internecie, mianie niaredka zaprašali na sumoŭi. Tam ja vydatna adkazvała na samyja papularnyja pytańni: ahuč zakon Oma, jak padklučajecca razietka i hetak dalej.
Ale na mianie, ščupłuju, u sukiency, hladzieli i admachvalisia: kudy ty, maŭlaŭ, palezieš takaja. Niekatoryja, prosta pačuŭšy ŭ słuchaŭcy žanočy hołas, adrazu admaŭlali. I ciapier, kali chłopcy-elektryki kažuć mnie, što im składana znajści pracu, ja nie vieru i śmiajusia ŭ tvar: chaj by pasprabavali pabyć na maim miescy.
Karaciej, u vyniku ja zhubiła nadzieju i ŭžo źbirała rečy, kab viarnucca ŭ viosku. Ale ŭrešcie mnie ŭsio ž pieratelefanavali z mytni i zaprasili na trochmiesiačny vyprabavalny termin.
Pra pracu mantažnikam elektraabstalavańnia na mytni
Za try miesiacy mianie i jašče adnaho stažora jak tolki nie vypraboŭvali. Spačatku łajtova: zamianić lampačku ci razietku ŭ pamiaškańni, dzie siadzić kiraŭnictva mytni.
Na treci miesiac tam vyrašyli zamianić usio elektraabstalavańnie. Moj partnior, jak na zło, zachvareŭ. Pamiataju, razadrała sabie ŭsio, što mahčyma, pakul mianiała pravady z paškodžanaj izalacyjaj, ale spraviłasia.
Samym strašnym dla mianie było dziažuryć nočču, adnoj, u pakojčyku z dyziel-hienierataram. Siadziš kala jaho adna, za aknom — zavirucha. Viecier hudzić, hienieratar hudzić, a tabie pastajanna telefanujuć i sihnalizujuć: złamaŭsia śvietłafor, pierahareła lampačka… I pakul astatnija siadziać u ofisach, ty idzieš i ramantuješ heta na marozie, stojačy na leśvicy.
Peŭny čas, kali ja adpraŭlałasia mianiać lampački, mytniki źbiralisia pahladzieć na mianie jak na ekspanat. Ja zaŭsiody starałasia žartavać: maŭlaŭ, moža aŭtohraf dać?
Pra ŭdzieł u kastynhu «Mis Biełaruś»
Ja daŭno chacieła pasprabavać siabie ŭ konkursie pryhažości, prosta tamu što lublu novyja znajomstvy i ekśpierymienty. U finał nie prajšła. Moža, heta i dobra. Ad konkursu zastalisia dziŭnyja ŭražańni.
Pa-pieršaje, tam było šmat pastanovačnaści. Pa-druhoje, niaščyraści.
Naprykład, va ŭmovach konkursu było napisana: prychodzić na kastynh biez makijažu. Nu, ja i pryjšła. Ale amal usie astatnija dziaŭčaty byli nafarbavanyja ad dušy (byccam tolki z sałona pryhažości vyjšli). I nichto z žury nie paprasiŭ ich zmyć hetuju kaśmietyku.
Ja ŭvohule nie razumieju vulharnaści ŭ makijažy i adzieńni, jakija vykarystoŭvajucca, kab pryciahnuć uvahu. Ja za naturalnyja, spakojnyja kolery i rečy.
Pra budučyniu
Jašče ja za toje, kab raźvivacca i ruchacca napierad, tamu atrymlivaju vyšejšuju adukacyju i sprabuju siabie ŭžo ŭ jakaści prajekciroŭščyka ŭ nievialikaj firmie pa vytvorčaści katłoŭ (płanuju elektryku dla roznych budynkaŭ u kampjutarnych prahramach). U volny čas sprabuju razabracca ŭ zdarovym charčavańni i vučusia rabić manikiur.
Ja za toje, kab kožny vybiraŭ sabie prafiesiju pa dušy, niezaležna ad niejkich zabaron i stereatypaŭ, i tym bolš — połu.
