Dźmitryj Kałdun paraiŭ rasijancy Samojłavaj nie spadziavacca na pieramohu ŭ «Jeŭrabačańni»
Śpiavak Dźmitryj Kałdun, jaki pradstaŭlaŭ Biełaruś na «Jeŭrabačańni» ŭ 2007 hodzie, paraiŭ udzielnicy konkursu ad Rasii Julii Samojłavaj nie raźličvać na vysokaje miesca z-za składanaj palityčnaj situacyi.
Pieršy rasijski kanał u niadzielu prezientavaŭ kampazicyju «I Will not Break», ź jakoj Samojłava vystupić na konkursie pieśni «Jeŭrabačańnie-2018».
Na dumku Kałduna, novaje videa Samojłavaj bolš padobna na muzyčnuju paštoŭku, čym na klip u sučasnym razumieńni, ale, pavodle jaho słoŭ, dla konkursu hetaha całkam dastatkova.
«I z hołasam usio ŭ paradku. Spadziajusia, režysiory numara pravilna i karektna abyhrajuć vobraz Julii. Ale na zanadta vysokaje miesca ja b nie raźličvaŭ. Palityčnaja situacyja vielmi niaprostaja, a «Jeŭrabačańnie» nie Alimpijada — niama abjektyŭnych kryteryjaŭ acenki ŭdzielnika. Tolki subjektaŭ», — raspavioŭ Kałdun ria.ru.
Jon dadaŭ, što možna być najlepšym dla bolšaści, ale ŭsio roŭna apynucca la raźbitaha karyta.
