Z kałonii ŭ Horkach uciok rasijanin: zdabyŭ svoj pašpart i źjechaŭ na taksi za miažu
43-hadovy hramadzianin Rasii Alaksandr Mudračenka letaś naśmierć źbiŭ viełasipiedysta. Za heta mužčyna atrymaŭ 4 hady kałonii-pasialeńnia, ale pad vartaj nie zatrymaŭsia — złaviŭ taksi i źjechaŭ u Rasiju.
Ilustracyjnaje fota.
Samo DTZ z udziełam Mudračenki adbyłosia ŭnačy 19 červienia 2017 hoda. Mužčyna za styrnom «Falksvahiena» jechaŭ pa trasie Kryčaŭ — Orša — Lepiel. Niepadaloku ad vioski Zui jon vyrašyŭ abahnać mašynu, što jechała pierad im, i vyruliŭ na sustrečnuju pałasu. Tam jon źbiŭ viełasipiedysta, jaki jechaŭ pa ŭzbočynie sustrečki. Pryčym viełasipied mieŭ śviatłoadbivalnyja elemienty, adznačali paśla daišniki.
47-hadovy viełasipiedyst pamior na miescy.
Mudračenku zatrymali. Vyśvietliłasia, što jon pjany.
Mudračenka — žychar Kahałyma (heta poŭnač Rasii, Ciumienskaja vobłaść). Praŭda, naradziŭsia jon ŭ Kryčavie. Pryjazdžaŭ da svajakoŭ.
Mužčynu źmiaścili pad vartu. U kancy vieraśnia pačaŭsia sud. A 2 kastryčnika byŭ ahučany vyrak — 4 hady kałonii-pasialeńnia i zabarona kiravać aŭto na 5 hadoŭ. Paśla adsiedki jon musiŭ być ekstradavany ŭ Rasiju, bo maje hramadzianstva hetaj krainy.
Adbyvać termin Mudračenku nakiravali ŭ kałoniju №16 u Horkach, dzie zvyčajna i siadziać vinavatyja ŭ padobnych złačynstvach.
Ale ŭ sakaviku 2018 hoda stała viadoma, što Mudračenka ŭžo ŭ Rasii.
Pieršym pra heta paviedamiŭ rasijski telehram-kanał Mash. Pa ich infarmacyi, Mudračenka niejak zdabyŭ svoj pašpart, paśla čaho vyklikaŭ taksi i na im źjechaŭ u Rasiju. Tam jaho zatrymali palicejskija, ale vydavać biełarusam nie stali — praz hramadzianstva Rasii. Ciapier Mudračenka spakojna žyvie na voli.
U horackaj kałonii paćvierdzili: mužčyna sapraŭdy źbieh, jašče ŭ lutym. Praŭda, raspaviadać padrabiaznaści admovilisia.
