Prakuror: U Barysavie sudziać praparščyka ź Piečaŭ
U sud nakiravana sprava ŭ dačynieńni da praparščyka ź Piečaŭ, jaho abvinavačvajuć va ŭžyvańni hvałtu i chabarnictvie.
Paśla hibieli ŭ Piečach sałdata Alaksandra Koržyča centralny aparat SK zavioŭ nie adnu kryminalnuju spravu. Niekatoryja kryminalnyja spravy rasśledavała ŭpraŭleńnie SK pa Minskaj vobłaści, adno ź ich užo zavieršana.
— Litaralna ŭ pačatku hetaha hoda kryminalnaja sprava ŭ dačynieńni da praparščyka z 72-ha vučebnaha centra była nakiravana ŭ sud, — zajaviŭ siońnia ŭ čas pres-kanfierencyi prakuror Minskaj vobłaści Aleh Łaŭruchin. — Było ŭstanoŭlena zvyš 30 faktaŭ prymianieńnia hvałtu i atrymańnia chabaraŭ ad vajskoŭcaŭ. Naprykład, za naviedvańnie bufieta.
Pa słovach prakurora, sprava ŭžo razhladajecca ŭ sudzie Barysaŭskaha rajona, prysudu pa joj jašče niama.
Jon adznačyŭ, što paśla hibieli Koržyča prakurorskija rabotniki nie raz vyjazdžali ŭ Piečy.
— Vosieńniu 2017 hoda da hetaha vypadku nie było nivodnaj skarhi ad terminovaj słužby ni piśmova, ni vusna. Heta zrazumieła, jany dumajuć: vy pryjechali i źjechali, a nam jašče žyć, — razvažaje Aleh Łaŭruchin.