Studentka, jakuju Łukašenka dałučyŭ da bijatłona. Chto jana? FOTY
U ramkach turniru «Śniežny snajpier», jaki niadaŭna prymali «Raŭbičy», adbyłasia simvaličnaja honka z udziełam Alaksandra Łukašenki.
Za Łukašenkam biehli jaho małodšy syn Mikałaj, alimpijskija čempijonki Pchiončchana Darja Domračava, Iryna Kryŭko i Dzinara Alimbiekava, bronzavy pryzior Nahana Alaksiej Ajdaraŭ, a taksama ludzi z najbližejšaha atačeńnia kiraŭnika Biełarusi: doktar Śviatłana Kanašenka, pres-sakratar Natalla Ejsmant, Darja Šmanaj sa słužby pratakoła, himnastka Ksienija Sankovič. Niečakanaj udzielnicaj honki akazałasia studentka BNTU Alina Roskač.
Dziaŭčyna, u jakoj niama prafiesijnaj spartyŭnaj padrychtoŭki, biez prablem pieraadoleła dystancyju i navat atrymała ciopłyja słovy ad Sankovič:
— Mianie paradavała inšaja častka našaj kamandy: Śviatłana Kanašenka, Darja Šmanaj, Natalla Ejsmant i navat studentka BNTU Alina Roskač. Nichto ź ich nie adstaŭ, usie pierasoŭvalisia pa trasie vielmi hodna. Dziaŭčynki vydatna spravilisia, jany zasłuhoŭvajuć chvały.
U kamandzie kiraŭnika dziaržavy 21-hadovaja Roskač była zaŭvažanaja ŭpieršyniu.
Alina naradziłasia ŭ Śvietłahorsku. Kali joj było 18, pamierła maci. Taty dziaŭčyna nie viedaje — baćki ŭ šlubie nie znachodzilisia.
Roskač vučycca ŭ BNTU pa śpiecyjalnaści «inžynier-mietałurh».
Chobi Aliny — tancy. U Śvietłahorsku jana skončyła Dziciačuju škołu mastactvaŭ i tančyła ŭ kalektyvie estradnaha tanca «Rytm». Jašče adzin z talentaŭ dziaŭčyny — śpievy.
Roskač nieadnarazova ŭdzielničała ŭ konkursach pryhažości. U škole jana pradstaŭlała rodny horad na «Kryštalnaj nimfie» ŭ Homieli, a taksama zmahałasia za zvańnie «Mis Dažynki — 2013». U 2016-m Roskač udzielničała ŭ konkursie pryhažości «Mis BNTU». Dziaŭčyna stała druhoj vice-mis i była adznačana ŭ naminacyi «Mis tvorčaść».
U 2016-m Alina stała finalistkaj «Mis Biełaruś». Studentka nijakich uznaharod nie ŭziała, ale pryciahnuła ŭvahu žury. Arhanizatary ŭručyli 19-hadovaj dziaŭčynie finansavy hrant, pakolki jana zastałasia biez baćkoŭ. Heta biesprecedentny vypadak u historyi konkursu. Sumu hranta nie abviaščali.
Na tym mierapryjemstvie prysutničaŭ Alaksandr Łukašenka. U svajoj uračystaj pramovie kiraŭnik dziaržavy zapeŭniŭ, što ŭ žyćci udzielnic konkurs — heta «zorny start».
Paśla ŭdziełu ŭ «Mis Biełaruś» žyćcio Aliny sapraŭdy źmianiłasia. Dziaŭčyna razam ź inšymi finalistkami była zaprošanaja na Prezidencki bal vypusknikoŭ, dzie hracyi pradstavili kalekcyi viečarovych sukienak. Roskač taksama pabyvała na štohadovym fiestyvali «Aleksandryja źbiraje siabroŭ», jaki prachodzić na Škłoŭščynie ŭ śviata «Kupalle».
Za miežami sceny dziaŭčyna pavodzić siabie ścipła. U sacsietkach jana nie raźmiaščaje fatahrafii ŭ nižniaj bialiźnie — ličyć heta nieprymalnym. Jašče Alina pryznajecca, što nie vielmi padabajecca sabie z uśmieškaj, tamu na bolšaści zdymkaŭ jana amal nie uśmichajecca.
