Dziesiacihadovaja dziaŭčynka ŭ Finlandyi adpraviła prezidentu list sa składanym pytańniem — i atrymała adkaz
U minułym śniežni 10-hadovaja Livija Mieler z horada Kotka hladzieła pa televizary ŭračysty pryjom u prezidenta ŭ honar stahodździa Finlandyi. I tut jana raptam zadałasia nastupnym pytańniem: a chto vyrašaje, kaho zaprašać na pryjom?
Spačatku Livija spytała ŭ svajoj mamy, ale taja nie zmahła dać adkaz. Nastaŭnica taksama nie była ŭpeŭnienaja, chto prymaje takoje rašeńnie, tak što školnica vyrašyła zadać pytańnie naŭprost prezidentu Saŭli Niiniścio, nadrukavaŭšy list na kampjutary i adpraviŭšy jaho zvyčajnaj poštaj.
Prajšoŭ čas, i Livija paśpieła zabycca na svoj list. Siamja była ŭpeŭnienaja, što adkazu nie budzie. Ale niečakana ŭ kancy lutaha ŭ paštovaj skryni źjaviŭsia kanviert, na jakim krasavaŭsia finski hierb, a adras i imia atrymalnika byli vyviedzienyja kalihrafičnym počyrkam.
Unutry kanvierta ździŭlenyja Mielery pabačyli arkuš hierbavaj papiery z adkazam prezidenta na šviedskaj movie. Vybar movy byŭ abumoŭleny tym, što Livija napisała list na svajoj rodnaj movie — šviedskaj. Pravy nižni kut upryhožvaŭ fotazdymak prezidenckaha sabaki Lenu.
U liście ŭ adkaz kiraŭnik dziaržavy rastłumačyŭ dziaŭčyncy, što pryjom robić jon sumiesna sa svajoj žonkaj, i jany ž vyrašajuć, kaho paklikać na ŭračystaść. Jon taksama rastłumačyŭ, što pa tradycyi na pryjom zaprašajuć vieteranaŭ vajny i deputataŭ parłamienta, jakija pradstaŭlajuć narod Finlandyi.
U kancy lista Niiniścio pažadaŭ Livii paśpiachovaha hoda i pastaviŭ svoj podpis.
U kancylaryi prezidenta zapeŭnili, što kali ŭ liście staić asabisty podpis prezidenta, heta značyć, što jon adkazaŭ na zvarot dziaŭčynki asabista. Štohod pieršaj asobie krainy pastupaje ad čatyroch da piaci tysiač listoŭ, u asnoŭnym pa elektronnaj pošcie, i adkazać na kožny asabista prezident prosta nie ŭ stanie.
