NATA praviadzie najbujniejšyja z časoŭ chałodnaj vajny vučeńni ŭ Jeŭropie
Ints Kalnins, Reuters
Kamandzir Korpusa marskoj piachoty ZŠA hienierał Robiert Nieler na słuchańniach u kamitecie pa biudžetnych asihnavańniach Pałaty pradstaŭnikoŭ kanhresa ZŠA paviedamiŭ, što zapłanavanyja na vosień hetaha hoda vučeńni NATA ŭ Jeŭropie stanuć najbujniejšym z časoŭ chałodnaj vajny.
«Hetaj vosieńniu ŭ kastryčniku projduć maštabnyja vučeńni NATA, jakija stanuć samymi bujnymi manieŭrami z amfibijami z časoŭ piku chałodnaj vajny. Havorka idzie pra vučeńni Trident Juncture», — skazaŭ hienierał.
Pavodle jaho słoŭ, u manieŭrach prymuć udzieł kala 45 tys. vajskoŭcaŭ krain NATA, a taksama «dziasiatki i dziasiatki» karabloŭ i samalotaŭ, jakija byli zadziejničanyja ŭ manieŭrach la bierahoŭ Narviehii pa adbićci «zymitavanaj pahrozy».
Hienierał dadaŭ, što čakaje «demaršy i inšyja dziejańni» z boku Rasii. «Ale ja dumaju, što heta pakazvaje surjoznaść stratehii [ZŠA], a taksama toje, što našy jeŭrapiejskija sajuźniki chočuć bačyć našu prysutnaść tam [u Jeŭropie] i našu prychilnaść ich abaronie», — dadaŭ jon.
Vučeńni Trident Juncture pravodziacca raz u try hady i źjaŭlajucca najbujniejšymi manieŭrami NATA. U vučeńniach Trident Juncture — 2015, jakija prachodzili na terytoryi Partuhalii, Ispanii i Italii, brali ŭdzieł kala 36 tys. vajskoŭcaŭ krain NATA.
