Što novaha pakazvajuć aŭtavytvorcy na Ženieŭskim aŭtasałonie? Šmat FOTA
Pa tradycyi, u sakaviku ŭ šviejcarskaj Ženievie aŭtahihanty z usiaho śvietu pakazvajuć novyja madeli svaich mašyn, a taksama kancepty, nad jakimi płanujuć pracavać ciaham bližejšych hadoŭ.
U hetym hodzie na Ženieŭskim aŭtasałonie prasočvajecca tendencyja da pierachodu na hibrydnyja aŭtamabili: vytvorcy nie śpiašajucca całkam pierachodzić na elektryčnyja ruchaviki, jak Tesla, ale pry hetym źnižajuć uzrovień škodnych vykidaŭ i raschod paliva za košt pracy ruchavika ŭnutranaha zharańnia ŭ simbijozie z elektryčnym. Bolšaść aŭtavytvorcaŭ prezientavali chacia b adnu hibrydnuju viersiju.
Lexus
Kancept Lexus UX upieršyniu byŭ pakazany jašče na aŭtasałonie ŭ Paryžy. I voś, narešcie jon staŭ realnaściu: zaraz heta paŭnavartasnaja sieryjnaja madel. Novaja płatforma GA-C zabiaśpiečyła krasovieru zvyšnizki centr ciažaru, vysokuju ćviordaść kuzava i vydatnuju kiravanaść. U kanstrukcyi kuzava šyroka vykarystany aluminij: ź jaho zroblenyja dźviery, kryły i kapot.
Dla pačatku vytvorca pradstaviŭ dźvie madyfikacyi. Na Lexus UX 200 staić novy dvuchlitrovy bienzinavy ruchavik Dynamic Force z vysokaj termaefiektyŭnaściu. Mahutnaść ruchavika składaje 171 k.s. Lexus UX 250h abstalavany novaj hibrydnaj sistemaj čaćviortaha pakaleńnia. Razam z elektramatoram mahutnaść dasiahaje 178 k.s., firmovy elektramiechaničny varyjatar udaskanaleny, ale Toyota praciahvaje vykarystoŭvać nikiel-mietał-hidrydny ciahavy akumulatar zamiest sučasnaha lityj-ijonnaha. Batareja stała kampaktniej i raźmieščanaja pad zadnim siadzieńniem.
Aficyjnaj infarmacyi pra start prodažaŭ i košty na kamplektacyi pakul nie pastupała, ale, pa čutkach, aŭtamabil sydzie z kanviejera tolki ŭ lutym nastupnaha hoda.
Toyota
Toyota pakazała novy hibrydny aŭtamabil Auris. Aŭtamabil pabudavali na płatformie TNGA, jakaja taksama zabiaśpiečvaje bolš nizki centr ciažaru. Chetčbek staŭ krychu daŭžejšy za pradstaŭnikoŭ minułaha pakaleńnia.
Aŭtamabil prapanujuć ź dźviuma hibrydnymi siłavymi ŭstanoŭkami: 1,8-litrovy atmaśfierny ruchavik i elektramator (sumarnaj mahutnaściu 122 konskija siły) i 2,0-litrovym bienzinavym matoram z elektraruchavikom, jakija vydiuć 177 k.s.
Mercedes
Sport-siedan Mercedes-AMG GT topavaj kanfihuracyi abstalavany čatyrochlitrovym biturbavym ruchavikom V8, jaki razam z elektramatoram na zadniaj vosi raźvivaje mahutnaść 805 k.s. Dziakujučy hetamu aŭtamabil razhaniajecca da 100 km/h usiaho za 3,1 siekundy.
Kanceptualny sport-siedan pazbaŭleny bakavych lusterkaŭ. Zamiest ich — kamiery.
Airbus, Italdesigh i Audi
Hałoŭnaja asablivaść hetaha kancepta, stvoranaha sumiesna kampanijami Airbus, Italdesigh i Audi, kryjecca ŭ zdolnaści latać.
Usiu prastoru pad łabavym škłom zajmaje sensarny dyspłej, jaki, vidavočna, słužyć dla kiravańnia mašynaj i vyvadu aktualnaje infarmacyi pra pajezdku/palot. Terminy źjaŭleńnia navinki ŭ prodažy i košt nie vydajucca. Možna mierkavać, što taki futurystyčny kancept stanie realnaściu jašče nie chutka.
Jaguar
Pieršy kamiercyjny elektrakar brytanskaha vytvorcy Jaguar pazbaŭleny ruchavika ŭnutranaha zharańnia, jaki zamianili batarejaj na 90 kVt. Dziakujučy joj novy I-Pace zdolny prajechać na adnym zaradzie 480 km. Damahčysia anałahičnych pakazčykaŭ raniej atrymlivałasia tolki Tesla.
Dziakujučy 400 konskim siłam aŭtamabil razhaniajecca da 100 km/h usiaho za 4,5 siekundy. Na videa paraŭnoŭvajecca Jaguar I-Pace z Tesla Model X dźviuch madyfikacyj. Jaguar pieramoh u abodvuch vypadkach.
Čytajcie taksama: Renault prezientavała amal prazrysty bieśpiłotny elektramabil FOTA
