Pradstaŭniki IT-kampanij na sustrečy z dekanami IT-fakultetaŭ raskrytykavali navučalnyja prahramy
Pradstaŭniki viadučych biełaruskich IT-kampanij i dekany fakultetaŭ minskich i rehijanalnych univiersitetaŭ sabralisia razam, kab abmierkavać surjoznyja vykliki, jakija stajać pierad ajčynnaj IT-adukacyjaj, pieradaje BiełTA.
Udzielniki kruhłaha stała kanstatavali dźvie asnoŭnyja prablemy: značnaje adstavańnie navučalnych prahram ad imklivych źmianieńniaŭ u IT-halinie, a taksama deficyt vykładčykaŭ VNU ź nieabchodnymi techničnymi kampietencyjami. Mienavita jany i stali klučavymi temami dla abmierkavańnia.
Na dumku IT-kampanij, pry navučańni studentaŭ niedastatkova ŭvahi ŭdzialajecca prahramnaj architektury, sučasnym prahramnym srodkam i technałohijam. Prahramy časta dalokija ad patrebaŭ rynku i nie majuć praktyčnaje nakiravanaści. Pry hetym, pakolki pryjarytetnym napramkam dla IT-haliny Biełarusi ciapier stanovicca raspracoŭka ŭłasnych IT-praduktaŭ, možna čakać, što patrabavańni da jakaści padrychtoŭki IT-kadraŭ u samy bližejšy čas stanuć jašče vyšejšymi. Akramia taho, u PVT buduć aktyŭna raźvivacca najnoŭšyja napramki infarmacyjnych technałohij: Data Science, Blockchain, novyja haliny štučnaha intelektu i h. d. Heta značyć, pa šerahu napramkaŭ patrebna śpiecyjalnaja padrychtoŭka ŭ śfierach, jakija raźvivajucca chutčej, čym za imi paśpiavajuć VNU.
Rezidenty PVT užo ciapier akazvajuć značnuju padtrymku sistemie adukacyi. Stvorany i dziejničajuć šmatlikija sumiesnyja łabaratoryi IT-kampanij i VNU. Niepasredna ŭ kampanijach adkryty filijały kafiedraŭ, dzie studenty mohuć maksimalna akunucca ŭ IT-praktyku. Administracyja PVT inicyiravała i sumiesna ź Ministerstvam adukacyi realizuje prajekt pa navučańni movie prahramavańnia Scratch u siarednich škołach.
