«Prynamsi, ja viedaju, što mianie tut nie zabjuć» — historyja hieja z Rasii, jaki ŭciok u Biełaruś
Piotr (imia źmieniena) stvaryŭ novy akaŭnt u skajpie, kab raskazać svaju historyju brytanskamu ŁHBT sajtu PinkNews. Choć užo prajšło paŭhoda, jak hety prahramist pakinuŭ Rasiju, kab pačać novaje žyćcio ŭ Biełarusi, jon nie choča raskryvać svajo sapraŭdnaje imia.
U apošnija hady hiejam u Rasii žyviecca niaprosta. Historyja imihracyi pačałasia dla rasijanina, kali jaho susiedzi stali platkaryć pra Piatra i jaho bojfrenda. 32-hadovy chłopiec adčuŭ na svajoj skury, jak chutka raźlaciełasia navina pra jaho seksualnuju aryjentacyju ŭ padmaskoŭnym haradku. Choć jon pražyŭ u hetym haradku ŭsio svajo žyćcio, prablemy stali narastać.
Kali fatahrafija dvuch chłopcaŭ vyjšła ŭ lidary konkursu na najlepšuju vokładku rasijskaha katałoha kampanii IKEA, arhanizatary vydalili jaje sa śpisa. Ilustracyjnaje fota.
Kab zarabić na žyćcio, Piatru daviałosia pahadžacca na bolš nizkuju apłatu za pracu.
«Ja nie moh narmalna znajści pracu i zarabić na žyćcio, bo na forumie, na jakim raśpisanyja ŭsie prahramisty-fryłansiery, zhadali pra maju aryjentacyju. Ja nikoli nie chavaŭ, što ja hiej, ale paśla aŭtynhu ŭ prahramisckim asiarodku znajści pracu stała ciažej. Ja musiŭ pahadžacca na bolš nizki zarobak».
Prablemy pracaj nie abmiežavalisia. Svajaki zaniali varožuju pazicyju taksama i nie pakinuli Piatru inšaha varyjanta, jak tolki źjechać ad ich: «Siamja viedała pra maju aryjentacyju i pastaviłasia vielmi niehatyŭna. Adnoj z hałoŭnych pryčyn, kab pakinuć Rasiju, było toje, što tak mała padtrymki ja adčuvaŭ ad majoj siamji», — kaža chłopiec.
Ciažkaści stali adbivacca na adnosinach z bojfrendam taksama. Choć jany i pierajechali ŭ Pieciarburh u spadzievie na lepšaje žyćcio, adnosinam heta nie dapamahło, bo situacyja ŭ novym horadzie była ŭ pryncypie takoj ža. Adkrytyja hiei nie mahli znajści pracy i žyli ŭ strachu napadu. Adnojčy bojfrend Piatra skazaŭ, što jamu hetaha dosyć. Nie kožny zdolny padtrymlivać adnosiny, kali heta vyklikaje stolki prablem.
Paśla hetaha Piotr vyrašyŭ, što pryjšoŭ čas pakinuć Rasiju. Siabar paraiŭ jamu pierajechać u Biełaruś, dzie zdaŭna, jašče z časoŭ Ivana Žachlivaha i Piatra Pieršaha, znachodzili prytułak niamała mihrantaŭ z Rasii, jakija ŭciakali ad relihijnaha ci palityčnaha pieraśledu. «U Biełaruś možna pryjechać z Rasii navat biez pašparta i vizy. Praściej, čym va Ukrainu, što i stała vyrašalnym momantam», — kaža Piotr.
«Kali ja pryjechaŭ u Biełaruś, siabry prytulili i dapamahli ŭźniacca na nohi — dapamahli hrašyma i takoj-siakoj pracaj. Biełaruś bolš talerantnaja za Rasiju. Ja dahetul nie znajšoŭ stałaha zaniatku, ale prynamsi ja viedaju, što mianie tut nie zabjuć. Moža, nie całkam talerantnaja, a staramodnaja kraina, ale tut nie zabivajuć, jak u Rasii», — kaža ŭciakač.
Piotr, jak i nievialikaja hrupa jaho siabroŭ, ciapier trymaje svaju seksualnuju aryjentacyju ŭ sakrecie i kaža pra jaje tolki tady, kali adčuvaje siabie ŭ biaśpiecy: «Kali chto daviedajecca, što ja hiej, jany mohuć stać ahresiŭnymi, sprava moža dajści da bojki. U Rasii tak zaŭsiody — tolki hvałt. Tut ža niekatoryja ludzi vielmi spakojna staviacca, inšyja — zavodziacca. Ale ŭ paraŭnańni z Rasijaj, tut lahčej tryvać hety ciažar».
Padobna inšym rasijskim ŁHBT+ uciekačam u postsacyjalityčnych krainach, Piotr chvalujecca, što čas nie na jaho baku: kab žyć narmalnym žyćciom, treba vybiracca dalej. «Ja pracuju, kab sabrać dastatkova hrošaj i źjechać ź Biełarusi. Ja chaču ŭ Jeŭraźviaz, u anhłamoŭnuju krainu, dzie ludzi bolš ciarpimyja», — kaža Piotr.
