Na Viciebščynie žurnalista chočuć prymusić zamaŭčać: z pačatku hoda — 2 156 rubloŭ štrafaŭ
Niezaležnaha žurnalista z Hłybokaha Źmitra Łupača 6 sakavika znoŭ pakarali štrafam za «niezakonny vyrab pradukcyi ŚMI». Hetym razam na 563,5 rubla, piša Radyjo Svaboda.
Za dva ź liškam miesiacy z pačatku 2018 hoda Źmicier Łupač byŭ aštrafavany try razy: u sudach Pastaŭskaha, Dokšyckaha i Šarkaŭščynskaha rajonaŭ Viciebskaj vobłaści.
Ahulnaja suma štrafaŭ Łupača za materyjały, pakazanyja na telekanale «Biełsat», składaje 2 156 rubloŭ.
Spadar Łupač žartuje, što za košt jahonych štrafaŭ ułady spadziajucca papravić stan miascovaj ekanomiki.
«Letaś mianie najčaściej štrafavali ŭ Hłybockim rajsudzie, a sioleta — u troch susiednich rajonach. Jak na śmiech, apošni materyjał, za jaki mianie sudzili, byŭ z samaha biednaha rehijona Viciebščyny. Siaredni zarobak u Šarkaŭščynie daloka nie 500 dalaraŭ, a dobra kali 400 rubloŭ. Moj štraf i to bolšy! U inšych rehijonach, zrešty, praktyčna toje samaje, ale maje štrafy nivodzin biudžet nie ŭratujuć», — kaža žurnalist.
Pavodle rejtynhu, jaki składaje HA «BAŽ», Źmicier Łupač sioleta trapiŭ u lidary. Pa kolkaści i pamiery štrafaŭ jon sastupaje tolki homielskamu žurnalistu Kastusiu Žukoŭskamu (2 352 rubli za 2018 hod). Łupač źjaŭlajecca absalutnym rekardsmenam pa štrafach na Viciebščynie, miascovaja milicyja trymaje pad uvahaj pieradačy «Biełsatu» i adsočvaje siužety, źviazanyja z padziejami ŭ rehijonie.
