Biełčyhunka źmianiła praviły pravozu bahažu i źbirajecca letam pradavać kvitki bieź miesca na ciahniki rehijanalnych linij biznes-kłasa
Biełčyhunka patłumačyła, jakija źmieny adbuducca paśla ŭstupleńnia ŭ siłu Pastanovy Savieta Ministraŭ Respubliki Biełaruś ad 27 lutaha 2018 h. № 159.
Asnoŭnyja źmieny datyčacca praviłaŭ pieravozki ručnoj pakłažy, pieravozki žyvioł, paradku pieraafarmleńnia prajaznych dakumientaŭ i ich viartańnia.
U častcy pieravozki ručnoj pakłažy vyklučajecca punkt, jaki vyznačaŭ pieralik rečaŭ, jakija pieravoziacca biaspłatna, niahledziačy na ich pamiery (łyžy z pałkami, snoŭbordy, sadžancy raślin i inš.). Z hetaha času suma troch vymiareńniaŭ ručnoj pakłažy nie pavinna pieravyšać 200 sm, jana moža mieć vahu nie bolš za 36 kh. Usio, što nie adpaviadaje hetamu patrabavańniu, ličycca bahažom i apłačvajecca asobna.
Novy dakumient vyklučaje nieabchodnaść dadatkovaj apłaty pry pieravozcy drobnych žyvioł (kali pieravozka ažyćciaŭlajecca ŭ miežach normy ručnoj pakłažy na miescach, pryznačanych dla raźmiaščeńnia ručnoj pakłažy).
Adnosna paradku pieraafarmleńnia prajaznych dakumientaŭ, pastanovaj praduhledžana kampiensacyja pasažyru roźnicy koštu pieršapačatkovaha i znoŭ aformlenaha prajaznoha dakumienta ŭ vypadku źmianšeńnia koštu pajezdki pry pieraafarmleńni prajaznoha dakumienta na inšy ciahnik, jaki adychodzić raniej.
Źmieny datyčacca i viartańnia koštu prajezdu ŭ vypadkach šerahu niestandartnych situacyj. Naprykład, pry adsutnaści miesca ŭ ciahniku, na jakoje byŭ nabyty kvitok, i zhodzie pasažyra na inšaje miesca ŭ vahonie nižejšaha typu i (abo) kłasa, pasažyru kampiensujecca roźnica ŭ košcie prajezdu. Kali prapanujecca miesca ŭ vahonie bolš vysokaha typu i (abo) kłasa — dadatkovaja apłata nie spahaniajecca.
Taksama dakumientam vyznačana, što pry zatrymcy adpraŭleńnia ciahnika bolš jak na hadzinu sa stancyi pasadki pasažyra, jakoha čakaje pierasadka z adnaho na druhi ciahnik (intervał pamiž jakimi składaje bolš za 1 hadzinu), jon moža viarnuć na pieršapačatkovaj stancyi adpraŭleńnia prajaznyja dakumienty (kvitki), nabytyja na ŭvieś maršrut.
Taksama ŭ pieryjad masavych pieravozak razhladajecca mahčymaść u pierśpiektyvie realizacoŭvać kvitki bieź miesca (prajezd stojačy) u ciahnikach rehijanalnych linij biznes-kłasa.
