«Try biłbordy» ci «Forma vady»? Hreta Hiervih ci Hiljerma del Tora? Hałoŭnyja pytańni «Oskara»
Užo zusim chutka ŭ Halivudzie padviaduć vyniki čarhovaha kiniematahrafičnaha hoda. Łaŭreataŭ vyznačać u 24-ch naminacyjach. Raspaviadajem, čaho čakać u noč z 4 na 5 sakavika.
Jaki film stanie najlepšym?
«Oskar» maje reputacyju davoli pradkazalnaj cyrymonii, ale ŭ apošnija hady intryha ŭ hałoŭnaj naminacyi zachoŭvajecca da samaha kanca. Letaś heta navat vyliłasia ŭ hrandyjozny skandał, kali najlepšym filmam pamyłkova nazvali «Ła-Ła Łend» zamiest «Miesiacovaha śviatła».
Bolšaść ekśpiertaŭ addaje pieravahu stužcy «Try biłbordy na miažy Ebinha, Misury» Marcina Makdonacha.
Film raspaviadaje historyju maci-adzinočki Miłdred Chejz, jakaja aranduje try biłbordy, kab źviarnuć uvahu na zabojstva jaje dački i mierkavanuju biaździejnaść miascovaha šeryfa.
Krychu mienšyja šancy na pieramohu ŭ «Formy vady» Hiljerma del Tora. Ale kali mieksikaniec nie atrymaje pryz za najlepšy film, dyk amal dakładna budzie ŭznaharodžany «Oskaram» jak najlepšy režysior, bo aŭtar «Troch biłbordaŭ» u hetaj naminacyi adsutničaje naohuł.
Ci jość intryha ŭ piersanalnych naminacyjach?
Tut, zdajecca, usio jasna jak božy dzień. Amal niama sumnievaŭ, što statuetki atrymajuć Hery Ołdmen za rolu Uinstana Čerčyla ŭ filmie «Ciomnyja časy» dy Frensis Makdormand za hałoŭnuju rolu ŭ zhadanych «Troch biłbordach».
Kali ŭsio składziecca tak, jak miarkujuć ekśpierty, to dla Ołdmena heta budzie pieršy «Oskar» u karjery. Makdormand užo atrymlivała statuetku ŭ 1997 hodzie za rolu ŭ kultavym «Farho».
Kolki «Oskaraŭ» atrymaje «Dziunkierk»?
Vajennaja drama Krystafiera Nołana jašče vosieńniu razhladałasia jak hałoŭny favaryt «Oskara», ale adyšła na druhija pazicyi paśla vychadu bolš dziorzkich kankurentaŭ. Napiaredadni cyrymonii «Dziunkierk» zastajecca samym kasavym naminantam, ale z vaśmi patencyjnych uznaharod, jak miarkujuć ekśpierty, moža harantavana ŭziać tolki adnu — za najlepšy mantaž huku.
Ci ŭtrymajecca rekord Enia Marykone?
Na siońnia samym uzrostavym uładalnikam «Oskara» źjaŭlajecca italjanski kampazitar Enia Marykone, jaki ŭ 87 hadoŭ staŭ pieramožcam u naminacyi za najlepšy saŭndtrek.
Sioleta na rekord pretendujuć 89-hadovyja režysiorka Ańjes Varda i scenaryst Džejms Ajvary.
Darečy, Varda była pieršaj žančynaj-režysiorkaj, uznaharodžanaj za ŭkład u kinamastactva.
Što jašče cikavaha?
Jość niekalki akaličnaściaŭ, na jakija nielha nie źviarnuć uvahu.
U katehoryi «Najlepšy film nie na anhlijskaj movie» pradstaŭlena stužka rasijskaha režysiora Andreja Źviahincava «Nieluboŭ». Rasijanin užo naminavaŭsia na «Oskar» čatyry hady tamu z «Levijafanam». Šancy aceńvajucca nievysoka, ale zdarycca moža ŭsiakaje.
Naprykład, jak pieramoha čylijskaj dramy pra transseksuała «Fantastyčnaja žančyna».
Uładalnikami statuetak mohuć stać transhiendar i lehiendarny baskietbalist Kobie Brajant.
Afraamierykanski dakumientalist Jans Ford u svajoj stužcy «Stronh-Ajłend» raskazvaje historyju zabojstva brata, jakoje mocna paŭpłyvała na jaho siamju i padšturchnuła da źmieny połu.
Raźvitańnie z prafiesijnym sportam Kobie Brajanta stała siužetam multyplikacyjnaj stužki «Darahi baskietboł». Darečy, Brajant hulaŭ za «Łos-Andželes Łejkiers».
Kali kazać pra žančyn, to za «Oskar» buduć zmahacca režysiorka Hreta Hiervih — piataja ŭ historyi žančyna, jakuju naminavali ŭ hetaj katehoryi. A voś apieratarka Rejčeł Morysan naohuł pieršaprachodca siarod patencyjnych uładalnikaŭ uznaharody.
Jak miarkujuć ekśpierty, tema charasmientu dla hetaha «Oskara» budzie nieaktualnaj — čornych sukienak čakać nie varta.
Čytajcie taksama:
U Łos-Andžełasie ŭručyli «Oskara-2018». Pieramožca — «Forma vady»
